ԱԱԾ–ն արձագանքել է Ռոբերտ Քոչարյանի վերաբերյալ կադրերի արտահոսքի խնդրին

ՀՀ ազգային անվտանգության ծառայությունը, պատասխանելով NEWS.am-ի գրավոր հարցմանը, նշել է, որ իրավասու է որևէ նպատակով հրապարակել իր կողմից տնօրինվող տեղեկատվությունը: Լրատվամիջոցի գնահատմամբ՝ այս դիրքորոշմամբ կառույցը դե յուրե կրկնել է վարչապետ Նիկոլ Փաշինյանի հունիսի 18-ի հայտարարությունն այն մասին, որ ԱԱԾ աշխատակիցը կարող է որոշել՝ տեղեկատվությունն արտահոսի, թե ոչ:

Խոսքը հունիսի 14-ին «Զվարթնոց» օդանավակայանի հսկիչ-անցագրային կետի տեսախցիկի այն կադրերի մասին է, որոնցում պատկերված է, թե ինչպես են թույլ չտալիս երկրորդ նախագահ Ռոբերտ Քոչարյանին մեկնել երկրից: Կադրերը կարճ ժամանակ անց հայտնվել էին իշխանական ԶԼՄ-ներում:

Լրատվամիջոցի հստակ հարցերին պատասխանելու փոխարեն՝ ԱԱԾ-ն հղում է արել «Ազգային անվտանգության մարմինների մասին» օրենքի 15-րդ հոդվածին (լիազորություններ), մինչդեռ NEWS.am-ը հիշեցնում է նույն օրենքի 7-րդ հոդվածը, որն արգելում է անձի անձնական կյանքի մասին տեղեկությունների տարածումն առանց նրա համաձայնության:

Հիշեցնենք նաև, որ հունիսի 15-ին տեսագրության հրապարակման փաստով ԱԱԾ տնօրեն Անդրանիկ Սիմոնյանին էր դիմել ԱԺ «Հայաստան» խմբակցության պատգամավոր Գեղամ Մանուկյանը՝ ճշտելու ծառայողական քննության առկայությունը: