Ադրբեջանը 2025թ․ նախատեսում էր հարձակվել Հայաստանի վրա - Թաթոյան

Ադրբեջանը նախատեսել էր 2025-ի մարտին հարձակում գործել ՀՀ-ի վրա. ասուլիսին հայտարարեց «Միասնության թևեր» քաղաքական նախաձեռնության ղեկավար Արման Թաթոյանը,- հայտնում է aysor.am-ը։

Ըստ Թաթոյանի՝ ԱՄՆ հետախուզությունը մարտի սկզբին ունեցել է հիմնավոր տվյալներ, որ Ադրբեջանը պատրաստվում էր հարձակվել Հայաստանի վրա, հատկապես Սյունիքի ուղղությամբ։ Այս մասին հայտնել էր Ներսես Կոպալյանը՝ EVN-ի հետ հարցազրույցում։

Ակնհայտ է, որ ԱՄՆ-ի միջնորդությունը և նրանց առաջարկած TRIPP ծրագիրը փրկեցին իրավիճակը՝ կանխելով հարձակումը։ ԱՄՆ-ն թույլ չտվեց Ադրբեջանին հարձակվել Հայաստանի վրա նշել է Թաթոյանը։

Թաթոյանի կարծիքով Նիկոլ Փաշինյանը և իշխող «Քաղաքացիական պայմանագիր» կուսակցությունը չեն հասկանում Ադրբեջանի նման պետության հետ զիջումների քաղաքականության վտանգը։

Ադրբեջանը պատերազմները դիտարկում է որպես իշխանությունը պահպանելու գործիք։ Զիջումները միայն նոր ագրեսիաներ են հրահրում։ 2020-2024 թվականներին բոլոր զիջումների չնայած՝ Ադրբեջանի սպառնալիքը ոչ միայն չի վերացել, այլև մնացել է նույն մակարդակի վրա, նշել է Թաթոյանը։

Նա օրինակ է բերել նաև Սահմանադրական հանրաքվեի և Սահմանադրության փոփոխությունների հարցը՝ հայտարարելով, որ Նիկոլ Փաշինյանը այդ քայլերն անում է Ադրբեջանի պահանջով։ Թաթոյանը կարծում է, որ այդ զիջումը կատարվում է ձախողված քաղաքականության հետևանքով։