Ադրբեջանում ՌԴ դեսպան Միխայիլ Եվդոկիմովը հայտարարել է Ռուսաստանի եվ Ադրբեջանի տնտեսական համագործակցության ընդլայնման մասին

Ռուսաստանն ու Ադրբեջանը շարունակում են հետևողականորեն զարգացնել տնտեսական համագործակցությունը՝ ընդլայնելով առևտրային կապերն ու ֆինանսական ոլորտում փոխգործակցությունը։ Ըստ ադրբեջանական ԶԼՄ-ների՝ այս մասին հայտնել է Ադրբեջանում Ռուսաստանի դեսպան Միխայիլ Եվդոկիմովը։

Միխայիլ Եվդոկիմովի խոսքով՝ երկու երկրների միջև ապրանքաշրջանառությունը մոտեցել է 5 միլիարդ դոլարի։

Դիվանագետը նշել է, որ ակտիվ համագործակցություն կա նաև ֆինանսական ոլորտում, մասնավորապես՝ ազգային արժույթներով հաշվարկների ուղղությամբ։ Նրա խոսքով՝ ռուսական բիզնեսը դրական է գնահատում Ադրբեջանում ռուբլու և մանաթի օգտագործման պայմանները։

Եվդոկիմովը նաև ընդգծել է, որ Մոսկվայի և Բաքվի միջև պահպանվում են կանոնավոր շփումները տարբեր մակարդակներում, իսկ համագործակցությունը շարունակվում է տարբեր ոլորտներում։