Աղվերանում կայացել է հայ-ադրբեջանական սահմանազատման հանձնաժողովների 13-րդ հանդիպումը

Ապրիլի 29-ին Աղվերանում տեղի է ունեցել Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովների 13-րդ հանդիպումը՝ ՀՀ փոխվարչապետ Մհեր Գրիգորյանի և Ադրբեջանի փոխվարչապետ Շահին Մուստաֆաևի նախագահությամբ, հայտնում են ՀՀ ԱԳՆ-ից:

Կողմերը քննարկել են սահմանազատման գործընթացի կազմակերպչական և տեխնիկական հարցերը, ինչպես նաև համաձայնեցրել մի շարք ուղեցույցների նախագծեր՝ փորձագիտական խմբերի աշխատանքի, քարտեզների կազմման և փաստաթղթերի ձևակերպման վերաբերյալ։

 Պայմանավորվածություն է ձեռք բերվել ներկայացնել դրանք կառավարություններին՝ հաստատման համար։

 Նշվել է՝ Ադրբեջանի տարածքով դեպի Հայաստան բեռների տարանցումը շարունակվում է, ինչպես նաև իրականացվում է նավթամթերքի մատակարարում։

 Հանդիպմանը քննարկվել են առևտրատնտեսական համագործակցության զարգացման հարցեր։

Հանդիպման արդյունքներով ստորագրվել է արձանագրություն, իսկ հաջորդ հանդիպման անցկացման ժամկետը կճշտվի աշխատանքային կարգով։