Անտրամաբանական է Հայաստանին սպառնալ թանկ գնով, որովհետև թանկ գնով սպառնալիքին կա պատասխան. Նիկոլ Փաշինյան

Վարչապետ Նիկոլ Փաշինյանը Գառնիում բնակիչների հետ հանդիպման ժամանակ հայտարարել է, որ Հայաստանի ժողովուրդը պետք է ունենա ԵԱՏՄ-ի և ԵՄ-ի միջև ընտրության այլընտրանք, հայտնում են տեղական ԶԼՄ-ները։

 Արձագանքելով արտաքին հնարավոր սպառնալիքներին ու տնտեսական ճնշումներին՝ կառավարության ղեկավարն ընդգծել է, որ թանկացումների սպառնալիքին Հայաստանը կպատասխանի սեփական եկամուտների ավելացմամբ։

«Մենք այլևս էն կուչ եկած պետությունը չենք։ Հայաստանը դառնում է խաղաղության խաչմերուկ, ինչը նշանակում է միլիարդների և տրիլիոնների շրջանառություն»,- նշել է Փաշինյանը։

Հատկանշական է, որ այս հայտարարությունները հնչում են ռուսական «Կոմերսանտ»-ի հրապարակման ֆոնին, ըստ որի՝ Մոսկվան զգուշացրել է Երևանին գազային համաձայնագրի հնարավոր խզման մասին՝ ԵՄ-ին ինտեգրվելու քայլերի պատճառով։