Արարատ Միրզոյանն անդրադարձել է տարբեր ոլորտներում Հայաստանի կախվածության նվազեցման թեմային

«Երևանյան երկխոսություն» միջազգային համաժողովի շրջանակներում անցկացված քննարկման ժամանակ ՀՀ ԱԳ նախարար Արարատ Միրզոյանը խոսել է Հայաստանի քաղաքական, տնտեսական ու էներգետիկ կախվածության թեմայից և ասել է, որ տասնամյակներ ու դարեր շարունակ մենք միշտ մտածել ենք, որ այս թշնամական միջավայրում մեզ պետք է մեկ ուժեղ, մեծ եղբայր, ընկեր, որը կարող է մեզ պաշտպանել:

« Հիմա, կարծես, մենք ինչ-որ կերպ կարողացել ենք մեկ կենտրոնից մեր քաղաքական, տնտեսական, էներգետիկ կախվածությունը նվազեցնել և դիվերսիֆիկացնել մեր բարեկամների թիվը»,- ասել է Միրզոյանը՝ նկատի ունենալով այն հանգամանքը, որ 2022 թվականի սեպտեմբերին, երբ Ադրբեջանը հարձակվել էր ՀՀ ինքնիշխան տարածքի վրա, Հավաքական անվտանգության պայմանագրի կազմակերպությունը, որի անդամ է Հայաստանը, և Ռուսաստանը, որը Հայաստանի ռազմավարական դաշնակիցն է, Հայաստանին օգնության չհասան։