Արդարադատության նախարարությունն ընդունել է Համաշխարհային բանկի պատվիրակությանը

Այսօր արդարադատության նախարարի տեղակալ Օկսաննա Աբրահամյանն ընդունել է Համաշխարհային բանկի պատվիրակությանը՝ Պետական հատվածի արդիականացման չորրորդ ծրագրի և Հարավային Կովկասում թվայնացման հնարավորությունների ապահովման նպատակով իրականացվող տեխնիկական աջակցության շրջանակում, այս մասին հայտնում է ՀՀ արդարադատության նախարարությունը։

Պատվիրակության կազմում ընդգրկված էին Համաշխարհային բանկի աշխատախմբի ղեկավարներ Արման Վաթյանը և Խուրամ Ֆարուկը։

Հանդիպման ընթացքում կողմերն ամփոփել են ծրագրի ընթացիկ փուլում արձանագրված արդյունքները՝ քննարկելով նախորդ այցից հետո իրականացված աշխատանքներն ու առաջիկա քայլերը։

Անդրադարձ է կատարվել իրավաբանական անձանց պետական ռեգիստրի համակարգի արդիականացման գործընթացին, ինչպես նաև Ազգային արխիվի թվայնացման հայեցակարգի շրջանակում իրականացվող և նախատեսվող միջոցառումներին։

Օկսաննա Աբրահամյանը կարևորել է Համաշխարհային բանկի հետ համագործակցությունը՝ ընդգծելով, որ այն նպաստում է պետական կառավարման թվայնացման խորացմանն ու արդյունավետության բարձրացմանը։