Արդյո՞ք Ֆրանսիայի նախագահի աջակցությունը Փաշինյանին օտարերկրյա միջամտություն չէ

ՀՀ վարչապետ Նիկոլ Փաշինյանի հետ հանդիպումից հետո կայացած մամուլի ասուլիսին  Ֆրանսիայի նախագահ Էմանուել Մակրոնը պատասխանել է  ֆրանսիացի լրագրողի հարցին: 

Լրագրողը հիշեցրել է, որ Մակրոնը խոսել է Հայաստանի ընտրություններում ռուսական միջամտության մասին ու հետաքրքրվել է՝ արդյո՞ք Ֆրանսիայի նախագահի աջակցությունը Փաշինյանին նույնպես օտարերկրյա միջամտություն չէ:

«Անհրաժեշտ է տարբերել օտարերկրյա միջամտությունները, որոնք փորձում են մանիպուլյացիայի ենթարկել ժողովրդավարական կյանքը բաց երեսով ստանձնվող քաղաքական դիրքորոշումներից: Ես ստանձնում եմ այս աջակցությունը: Ես աջակցում եմ իմ այս գործընկերոջը, ում վստահում եմ ութ տարի շարունակ, ինչպես դա արել եմ՝ աջակցելով Մոլդովայի նախագահ Մայա Սանդուին, ով դիմակայում էր ոչ եվրոպական այլընտրանքի: Ես լիովին ստանձնում եմ Եվրոպան պաշտպանելու այս որոշումը: Դա նույնը չէ, ինչ այդ ազդեցությունները, տեղեկատվության մանիպուլյացիաները լրատվամիջոցների միջոցով, կեղծ ինֆորմացիա տարածելու միջոցով իրավական պետությունը ապակայունացնելու փորձերը: Տարբերությունը սրանում է»,- ասել է Մակրոնը:

Փաշինյանին ուղված լրագրողի այն հարցին , թե մինչև ո՞ւր դուք կարող եք գնալ ԵՄ հետ մերձեցման առումով,

Փաշինյանն ասել է, որ այս հարցին ես պատասխանել եմ 2023թ-ին Եվրոպական խորհրդարանում իմ ելույթում. «Հայաստանը պատրաստ է ԵՄ-ին լինել այնքան մոտիկ, որքան ԵՄ-ն հնարավոր կհամարի»: