Արմեն Աշոտյանի կալանքը 1 ամսով երկարաձգվեց

ՀՀԿ փոխնախագահ, կրթության և գիտության նախկին նախարար Արմեն Աշոտյանի կալանքի ժամկետը երկարաձգվեց 1 ամսով։ ՀՀ հակակոռուպցիոն դատարանի դատավոր Արամ Գրիգորյանը մասնակիորեն բավարարել է քննչական մարմնի միջնորդությունը։ Այս մասին լրագրողների հետ զրույցում հայտնեց Աշոտյանի փաստաբան Ռուբեն Մելիքյանը։

«Կատարված վարույթային գործողությունների շատ քիչ մասն է առնչվել Արմեն Աշոտյանին: Դատական ակտը ստանալուց հետո այն անպայման կբողոքարկենք Վերաքննիչ դատարանում: Ամեն անգամ որոշակի հույսեր ունենում ենք, քանի որ գործը բացարձակ հիմնազուրկ է: Մեկ ամսով կալանավորեցին, երևի քննչական մարմնի ակնկալիքն այն է, որ պետք է շատ ավելի արագ ու ջանասիրաբար գործի»,- նշեց Մելիքյանը՝ հավելելով, որ որոշման պաշտոնական տեքստը դեռ չեն ստացել:

Հիշեցնենք, որ Արմեն Աշոտյանը կալանավորվել էր հունիսի 5-ին։ ՀՀ քննչական կոմիտեն ձերբակալման որոշումներ էր կայացրել ընդհանուր առմամբ 7 նախկին պաշտոնյաների նկատմամբ։

Ըստ իրավապահ մարմնի՝ վարույթը վերաբերում է պաշտոնեական լիազորությունների չարաշահմանն ու փողերի լվացմանը, որի արդյունքում կիրառվել է կոռուպցիոն սխեմա։ Ըստ մեղադրանքի՝ Աշոտյանը, այլ անձանց հետ հանցակցությամբ, օժանդակել է ֆինանսների նախկին նախարար Գագիկ Խաչատրյանին և նրա որդուն՝ Արտյոմ Խաչատրյանին, ձեռք բերել օտարման ոչ ենթակա պետական գույք։

Խոսքը Երևանի Պուշկինի փողոցի 38/1 շենքում գտնվող, շուրջ 208.9 միլիոն դրամ արժողությամբ և 451.1 քմ մակերեսով անշարժ գույքի ու դրան կից հողամասի մասին է, որը, ըստ ՔԿ հաղորդագրության, ոչ ուսումնական նպատակներով օգտագործվելու համար փոխանցվել է Խաչատրյանների սեփականությանը։