Բաքուն Թուրքիայից եկող «հիբրիդային սպառնալիքի» մասին է խոսում

Ադրբեջանի Միլի մեջլիսի՝ Արտաքին միջամտության և հիբրիդային սպառնալիքների հակազդման ժամանակավոր հանձնաժողովն ուսումնասիրել է վերջին օրերին Թուրքիայի տարածքից սոցիալական մեդիայի հարթակներում Ադրբեջանի դեմ իրականացվող տեղեկատվական արշավը։

Հանձնաժողովի հաղորդագրության համաձայն՝ ուսումնասիրության արդյունքում արձանագրվել է, որ որոշակի կենտրոնների կողմից իրականացվող արշավի նպատակն է վնաս հասցնել ադրբեջանա-թուրքական բարեկամական և դաշնակցային հարաբերություններին, մոլորեցնել հասարակական կարծիքը, քաղաքացիների շրջանում Ադրբեջանի իշխանությունների նկատմամբ անվստահություն ձևավորել և հասարակության մեջ բևեռացում առաջացնել։

Հանձնաժողովի պնդմամբ՝ քարոզչությունն իրականացվում է համակարգված կերպով՝ թիրախավորված գովազդի, ինչպես նաև սոցիալական ցանցերում իրական և կեղծ հաշիվների միջոցով։ Հաղորդագրության մեջ նշվում է, որ արշավին աջակցում են նաև Ադրբեջանում և Թուրքիայում գտնվող որոշ անձինք։

«Չնայած այն հանգամանքին, որ Թուրքիայի Հանրապետության օրենսդրությամբ նման գործունեությունը կարող է առաջացնել իրավական պատասխանատվություն, արշավը դեռ շարունակվում է»,- ասվում է հանձնաժողովի եզրակացության մեջ։

Հանձնաժողովը հայտնել է նաև, որ համակարգված տեղեկատվական արշավի մասնակիցների վերաբերյալ տեղեկությունները կներկայացվեն Ադրբեջանի համապատասխան պետական մարմիններին։

Միաժամանակ հանձնաժողովը Թուրքիայում բնակվող Ադրբեջանի քաղաքացիներին կոչ է արել զգոն լինել և չտրվել կեղծ տեղեկատվության ազդեցությանը։