CBS News. ԿՀՎ տնօրենը Կուբա է ժամանել Մադուրոյի ձերբակալությանը մասնակցած օպերատիվ աշխատակցի հետ

ԱՄՆ Կենտրոնական հետախուզական վարչության (ԿՀՎ) տնօրեն Ջոն Ռեթքլիֆն անցած շաբաթ հազվադեպ հանդիպում է ունեցել Հավանայում կուբացի բարձրաստիճան պաշտոնյաների հետ։ Ինչպես հայտնում է CBS News-ը՝ հղում անելով սեփական աղբյուրներին, Ռեթքլիֆի պատվիրակության կազմում եղել է մի ուշագրավ օպերատիվ աշխատակից։ Խոսքը ռազմականացված կազմավորումների այն սպայի մասին է, որն այս տարվա սկզբին մասնակցել էր Վենեսուելայի նախկին առաջնորդ Նիկոլաս Մադուրոյի ձերբակալման հատուկ գործողությանը։

Վենեսուելան և Կուբան տարիներ շարունակ եղել են մտերիմ դաշնակիցներ։ Կուբայի կառավարության տվյալներով՝ ընթացիկ տարվա հունվարին տեղի ունեցած այն գործողության ժամանակ, երբ կուբայական կողմը փորձում էր ազատագրել Մադուրոյին, սպանվել էր 32 կուբացի զինվորական ու ոստիկան։

Աղբյուրների փոխանցմամբ՝ ԿՀՎ տնօրենը կուբացիներին է ներկայացրել հենց այն սպային, ով ղեկավարել էր Վենեսուելայում իրենց համագործակիցների սպանության հանգեցրած գործողությունը։ Այս քայլը, ըստ վերլուծաբանների, Կուբայի իշխանություններին ուղղված հստակ ուժային ազդանշան էր։

ԿՀՎ ներկայացուցչի հաղորդմամբ՝ Ջոն Ռեթքլիֆի հանդիպած առանցքային անձանցից մեկը եղել է Ռաուլ Ռոդրիգես Կաստրոն (Ռաուլիտոն)՝ Կուբայի նախկին նախագահ Ռաուլ Կաստրոյի թոռը։

Այս գաղտնի հանդիպումից ընդամենը մեկ շաբաթ անց ԱՄՆ դաշնային դատարանը հրապարակեց նոր մեղադրական եզրակացություն.

• Թիրախը. 94-ամյա Ռաուլ Կաստրո-ավագ։

• Մեղադրանքը. Սպանություն և դավադրություն՝ կապված 1996 թվականին Կուբայի երկնքում ամերիկյան երկու քաղաքացիական ինքնաթիռների կործանման հետ, որը մահացու հետևանքներ էր ունեցել։

ԿՀՎ ղեկավարի այցը տեղի է ունենում Վաշինգտոնի կողմից Հավանայի նկատմամբ ամիսներ շարունակվող կոշտ ճնշումների ֆոնին։ ԱՄՆ վարչակազմը սպառնացել է բարձր մաքսատուրքեր սահմանել ցանկացած երկրի դեմ, որը կփորձի նավթ արտահանել Կուբա, ինչն արդեն իսկ կղզեպետությունում հանգեցրել է վառելիքի սուր ճգնաժամի։