Չենք պատրաստվում լարվածություն մտցնել Հայաստան-Ռուսաստան հարաբերություններում. Արարատ Միրզոյան

Գաղտնիք չէ, որ Հայաստանն ու Եվրոպական Միությունն օր-օրի ավելի են մոտենում միմյանց, դրա համար կան բոլոր հնարավորությունները։ Եվ երբ հարցնում եք այդ առիթով այլ գործընկերների, մասնավորապես՝ Ռուսաստանի կողմից հնչող գնահատականների մասին, մենք չենք պատրաստվում «ապահարզան ունենալ» որևէ գործընկերոջ հետ, լրագրողների հետ զրույցում հայտարարել է Հայաստանի ԱԳ նախարար Արարատ Միրզոյանը։

«Քաղաքականությունն ու դիվանագիտությունն այդպիսի «ապահարզաններ» չի ճանաչում պատմության ընթացքում։ Մենք չենք պատրաստվում լարվածություն մտցնել Հայաստան-Ռուսաստան հարաբերություններում։ Մենք գործընկերներ ենք, որոնք կապված են բազմաթիվ կապերով, տրամադրված ենք առողջ քննարկման միջավայրում այդ փոխշահավետ հարաբերությունները զարգացնելուն»,- նշել է Միզոյանը։

Նրա խոսքով՝ խնդիրներ էլ կան, ավելացրեց նաև, թե խնդիրներ կան ամբողջ աշխարհում։

«Պետք է այդ խնդիրների կառուցողկան լուծումները գտնել»,-ասել է Միրզոյանը։

Նա ընդգծել է՝ Ռուսաստանից չէ, որ Հայաստանին պետք է ասեն, որ ԵԱՏՄ-ին անդամակցությունը և ԵՄ-ին անդամակցությունն անհամատեղելի են։

«ԵՄ-ին մեր մոտարկումը շարունակելու ենք, և երբ կհասունանա այդ պահը, որ պետք է որոշում կայացնենք՝ լինել այս, թե այն խմբի երկրների ընտանիքների անդամ, մենք այդ որոշումը կկայացնենք։ Դրսից չէ, որ մեզ պետք է այդ մասին ասեն»,- ասել է Միրզոյանը։