Դատախազությունը Նարեկ Կարապետյանի վերաբերյալ նոր միջնորդություն է ներկայացրել ԿԸՀ. փաստաբան

Փաստաբան Արամ Վարդևանյանը ճեպազրույցի ընթացքում հայտարարել է, որ այսօր՝ ժամը 17:00-ին, Կենտրոնական ընտրական հանձնաժողովի նիստի օրակարգում ընդգրկված դատախազության միջնորդությունը վերաբերում է Նարեկ Կարապետյանին։

Վարդևանյանի խոսքով՝ միջնորդությունը ներկայացվել է նույն տրամաբանությամբ, ինչ նախկինում ներկայացված և հետ վերադարձված միջնորդությունը։ Նա հիշեցրել է, որ նախորդ անգամ հրատապ նիստում որոշվել էր, որ տվյալ հարցն այլևս ԿԸՀ իրավասության տիրույթում չէ։

«Սա հերթական քաղաքական հետապնդման դրսևորումն է, Նարեկ Կարապետյանի գործունեությանը միջամտելու և խոչընդոտելու փորձ։ Սա, մեղմ ասած, իրավունքի նկատմամբ ծաղր է»,–ասել է նա։