ԵԱՏՄ և ԵՄ միջև ընտրության հարցը կդիտարկվի միայն անհրաժեշտության դեպքում. Մհեր Գրիգորյան

Հայաստանը կմտածի Եվրասիական տնտեսական միության և Եվրամիության միջև ընտրության մասին, երբ հարցը կդրվի կտրուկ կերպով, հայտարարել է Հայաստանի փոխվարչապետ Մհեր Գրիգորյանը՝ «Վեստի» տեղեկատվական ծառայության հեղինակ Պավել Զարուբինի  հարցազրույցում, հայտնում է «Ինտերֆաքսը»:

Նա նշել է, որ ներկայում Հայաստանը ԵԱՏՄ-ից դուրս գալու հարց չի քննարկում։

«Երբ հասնենք նրան, որ այդ հարցը կդրվի կտրուկ կերպով, այդ ժամանակ արդեն կլինի կոնկրետություն, և եթե անհրաժեշտ լինի, կանցկացնենք սթրես-թեստեր։ Այս պահին մենք պարզապես նման սցենար չենք դիտարկում», — ասել է Գրիգորյանը։

Նրա խոսքով՝ Հայաստանը չի քննարկում Եվրասիական տնտեսական միության հետ կապերի խզումը, հետևաբար տնտեսական հնարավոր կորուստների հաշվարկներ անելն այս փուլում նպատակահարմար չէ։

Գրիգորյանը նաև նշել է, որ Ռուսաստանի հետ ապրանքաշրջանառության խնդիրները կրում են տեխնիկական բնույթ, և այժմ դրանցից տնտեսական հետևություններ անելն իմաստ չունի։

«Հետևաբար, որևէ վերլուծություն անել առևտրաշրջանառության վերաբերյալ ես պարզապես նպատակահարմար չեմ տեսնում և հույս ունեմ, որ Ռուսաստանի ուղղությամբ ապրանքների տեղաշարժի ներկայիս խնդիրները տեխնիկական են և շուտով կլուծվեն», — ասել է փոխվարչապետը։

Նա նշել է նաև, որ կիսում է Հայաստանի վարչապետ Նիկոլ Փաշինյանի այն կարծիքը, որ Հայաստանը պետք է հարստանա։

«Իհարկե, ես կիսում եմ վարչապետի կարծիքը։ Դա ինքնին այդպես է։ Թե ինչպես կզարգանա հարստացումը, ինչ հոսքեր կլինեն՝ դա երկար քննարկման թեմա է, և այս պահին դժվար է հստակ պատասխան տալ», — հավելել է Գրիգորյանը։