ԵՄ-ը և Հայաստանը ամրապնդում են քաղաքացիական պաշտպանության ոլորտում համագործակցությունը․ ստորագրվել է համաձայնագիր

ՆԳ նախարարի տեղակալ Արմեն Ղազարյանը Բրյուսելում հանդիպել է Եվրոպական հանձնաժողովի քաղաքացիական պաշտպանության և մարդասիրական օգնության գլխավոր տնօրինության (DG ECHO) ներկայացուցիչների հետ, այս մասին տեղեկանում ենք  ՀՀ Ներքին Գործերի նախարարությունից։

ՆԳ նախարարի տեղակալ Արմեն Ղազարյանը և կազմակերպության գլխավոր տնօրեն Մաչեյ Պոպովսկին ստորագրել են Ներքին գործերի նախարարության և Եվրոպական հանձնաժողովի DG ECHO-ի միջև քաղաքացիական պաշտպանության ոլորտում համագործակցությանը վերաբերող վարչական համաձայնագիր։

 Համաձայնագիրը նպատակ ունի ամրապնդել արտակարգ իրավիճակներին արձագանքման կարողությունները և տեղեկատվության փոխանակումը։

«Վարչական պայմանավորվածության ստորագրմամբ՝ հիմք ենք դնում Եվրոպական հանձնաժողովի Եվրոպական քաղաքացիական պաշտպանության և մարդասիրական օգնության գործողությունների գլխավոր տնօրինության հետ համագործակցության հետագա ամրապնդման համար», – ընդգծել է Արմեն Ղազարյանը։

Համաձայնագրի շրջանակում նախատեսվում է աջակցություն աղետների ռիսկերի կառավարման բոլոր փուլերում՝ կանխարգելումից, պատրաստվածությունից մինչև արձագանք և վերականգնում։

«Առավել դիմակայուն քաղաքացիական պաշտպանության համակարգ կառուցելու գործում Հայաստանին աջակցելու մեր հանձնառությունը շարունակական է, ինչը նպաստում է ոչ միայն Հայաստանի, այլև ավելի լայն իմաստով տարածաշրջանային անվտանգությանը»,- նշել է Մաչեյ Պոպովսկին։

ԵՄ ներկայացուցիչները ընդգծել են Հայաստանի հետ համագործակցության շարունակականության կարևորությունը՝ այն դիտարկելով նաև տարածաշրջանային անվտանգության ամրապնդման տեսանկյունից։ Քննարկվել են նաև ԵՄ քաղաքացիական պաշտպանության մեխանիզմի շրջանակում համատեղ աշխատանքի հնարավորությունները։