Էրդողանը շնորհավորել է Փաշինյանին ընտրություններում հաղթանակի կապակցությամբ

Թուրքիայի նախագահ Ռեջեփ Թայիփ Էրդողանը շնորհավորական ուղերձ է հղել ՀՀ վարչապետ Նիկոլ Փաշինյանին՝ խորհրդարանական ընտրություններում «Քաղաքացիական պայմանագիր» կուսակցության հաղթանակի առթիվ, այս մասին հայտնում է ՀՀ կառավարության մամուլի ծառայությունը։

Ուղերձում Էրդողանը նշել է, որ ընտրությունների արդյունքները շնորհավորում է ինչպես Թուրքիայի ժողովրդի, այնպես էլ իր անունից՝ մաղթելով հաջողություն Փաշինյանին կառավարության ձևավորման գործընթացում։

Թուրքիայի նախագահը ընդգծել է, որ հավատում է տարածաշրջանում երկարատև խաղաղության և կայունության հաստատմանն ուղղված Փաշինյանի ռազմավարական տեսլականի իրականացմանը և կարևորել է այդ նպատակով անհրաժեշտ համագործակցությունը։

Նա նաև մաղթել է առողջություն և բարեկեցություն Փաշինյանին, իսկ Հայաստանի ժողովրդին՝ բարգավաճում և երջանկություն։