Եթե ՌԴ–ն կարող է սանկցիաներին դիմանալ, ապա Հայաստանը չի կարող. Փաշինյան

Եթե Ռուսաստանը կարող է սանկցիաներին դիմանալ, ապա Հայաստանը չի կարող։ Այսօր Երևանի Աջափնյակ վարչական համայնքում քարոզարշավի շրջանակում լրագրողների հետ զրույցում ասել է «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը` անդրադառնալով այն հարցին, թե ինչպես է արտահայտվում ՀՀ իշխանությունների բալանսավորված քաղաքականությունը ԵՄ–ի և Ռուսաստանի հետ։

 

Փաշինյանը ընդգծել է` պաշտոնական Երևանը հայտարարել է, որ արևմտյան սանկցիոն ռեժիմի մեջ չի մտնելու ու այնպիսի քայլեր չի անելու, որ ընկնի սանկցիաների տակ։

 

«Այդ մասին մենք թափանցիկ ասել ենք և՛ Ռուսաստանի, և՛ Եվրամիության գործընկերներին։ Մենք, բնականաբար, որևէ բան չենք ուզում անել Ռուսաստանի դեմ, սակայն մենք ունենք գիծ. եթե մենք զգանք, որ որևէ քայլ անելիս մենք ինքներս են ընկնում սանկցիաների տակ, մենք չենք անելու այդ քայլերը. ամենայն հարգանքով, խնդրում ենք ըմբռնումով մոտենալ, քանի որ եթե Ռուսաստանը կարող է սանկցիայի տակ լինել ու դիմանալ, ապա Հայաստանը չի կարող»,- ասել է նա։

 

Ըստ Նիկոլ Փաշինյանի` ԵՄ–ից կասկածներ կային, որ Հայաստանը շրջանցում է սանկցիաները։ Այդ իսկ պատճառով ՀՀ իշխանությունները ԵՄ ներկայացուցիչներին մի քանի անգամ հրավիրել են Երևան ու նաև գրավոր արձանագրել, որ Հայաստանը չի խախտում սանկցիաների ռեժիմը։