ՀԱՊԿ-ը հույս ունի, որ հայ-ադրբեջանական կարգավորումը կհանգեցնի կայուն խաղաղության Հարավային Կովկասում

ՀԱՊԿ–ը շարունակում է ուշադրությամբ հետևել Կովկասյան տարածաշրջանում անվտանգային զարգացումներին՝ ակնկալելով, որ հայ-ադրբեջանական հարաբերությունների կարգավորումը կբերի կայուն և երկարատև խաղաղության։ Մոսկվայում կազմակերպության խորհրդարանական վեհաժողովի խորհրդի նիստում հայտարարել է ՀԱՊԿ գլխավոր քարտուղար Թալաթբեկ Մասադիկովը, հայտնում է ТАСС գործակալությունը։

«Մենք չենք թուլացնում ուշադրությունը Կովկասյան տարածաշրջանում հավաքական անվտանգության իրավիճակի նկատմամբ։ Այստեղ, ինչպես թվում է, շարունակվում են կայուն խաղաղության և կայունության որոնումները։ Մենք արձանագրում ենք հուսադրող միտումներ, որոնք ուղղված են երկու երկրների միջև միջպետական համապարփակ խաղաղության համաձայնագրի ստորագրմանը։ Հույս ունենք, որ ադրբեջանա-հայկական հարաբերությունների կարգավորումը հուսալի ճանապարհ է դեպի Հարավային Կովկասում կայուն խաղաղություն և կայունություն», — հայտարարել է նա։