Հայաստան այցելող թուրք լրագրողները ստուգումներ են անցկացրել Շիրակում՝ սահմանի զրոյական կետում

Այս օրերին Հայաստանում Է գտնվում թուրքական «Iha» լրատվական գործակալության լրագրող Յ. Մութլուն: Ըստ վերջինիս հրապարակած հոդվածի, տարվում են աշխատանքներ հայ-թուրքական հարաբերությունների  կարգավորման գործընթացի  և  սահմանների հնարավոր բացման վերջին զարգացումների շուրջ: Այս մասին գրում է  թուրքական «Iha» լրատվական գործակալությունը:

Հոդվածում հեղինակը անդրադարձ է կատարում  «Թուրքական ավիաուղիներ»-ի կողմից Ստամբուլ-Երևան չվերթների վերջերս մեկնարկին, փոխնախագահ Ջևդեթ Յըլմազի մասնակցությանը՝ մայիսի 4-ին Երևանում կայացած Եվրոպական քաղաքական համայնքի 8-րդ գագաթնաժողովին, Անիի կամրջի համատեղ վերականգնման վերաբերյալ փոխըմբռնման հուշագրի ստորագրմանը և այլն:

Հոդվածում նշվում է, որ այժմ ուշադրությունը կենտրոնացած է Կարս-Գյումրու սահմանի վրա: Նշվում է նաև, որ հայկական կողմը ցանկանում է, որ սահմանը վերաբացվի, որպեսզի երկու երկրների միջև երկաթուղային երթևեկությունը վերսկսվի։ Անկարայի և Երևանի կողմից ձեռնարկված ջանքերի շրջանակներում ձեռնարկված վերջին կոնկրետ քայլը Կարս-Գյումրու երկաթուղու բացման մտադրության մասին համատեղ հռչակագրի ստորագրումն էր։  Ապրիլի 28-ին Կարսում կայացած Թուրքիա-Հայաստան համատեղ աշխատանքային խմբի հանդիպումը, որը ստեղծվել էր Թուրքիայի և Հայաստանի միջև Կարս-Գյումրու երկաթուղու վերականգնման և վերագործարկման համար, մեծացրեց սահմանի բացման սպասումները։ Կարս-Գյումրու երկաթուղին համարվում է կարևոր կապող գիծ Հայաստանի դեպի Արևմուտք բացման և Վրաստանից ու Կենտրոնական Ասիայից եկող կապող գծերի համար։

Հոդվածի հեղինակը նշում է նաև, որ Հայաստանի երկրորդ ամենամեծ քաղաքում՝ Շիրակում, Ախուրիկի երկաթուղային կայարանը և Աքյաքայի երկաթուղային կայարանը գտնվում են ընդամենը 10 կիլոմետր հեռավորության վրա։ Սակայն, սահմանի փակ լինելու պատճառով, ծառայությունները չեն գործում 33 տարի։