Հայաստան-Եվրամիություն առաջին գագաթնաժողովի արդյունքում ձեռք են բերվել կարևոր պայմանավորվածություններ և ստորագրվել փաստաթղթեր

 Հայաստան-Եվրամիություն առաջին գագաթնաժողովի արդյունքում ձեռք են բերվել կարևոր պայմանավորվածություններ և ստորագրվել փաստաթղթեր:

 ՀՀ-ԵՄ առաջին գագաթնաժողովի արդյունքներն ամփոփող ասուլիսի ժամանակ Եվրոպական հանձնաժողովի նախագահ Ուրսուլա ֆոն դեր Լայենը ներկայացրել է Հայաստանի և Եվրամիության համագործակցության գերակա 4 ուղղությունները: Այս մասին տեղեկանում ենք «Արմենպրես»- ից:

«Հայաստանը վաղուց ընդլայնված եվրոպական ընտանիքի արժեքավոր անդամ է։ Խաղաղ, թավշյա հեղափոխությունը 2018 թվականին ի ցույց դրեց ձեր երկրի հանձնառությունը եվրոպական արժեհամակարգին՝ ժողովրդավարությանը, օրենքի գերակայությանը և հիմնարար արժեքներին։

 Ցանկանում եմ վերահաստատել մեր ամուր աջակցությունը Հայաստանին։ Սա լավ հնարավորություն է ընձեռում խորացնել մեր կապերը և մեր եզակի գործընկերությունը բարձրացնել նոր մակարդակի, և մենք այդպես էլ կանենք»,- ասել է Եվրահանձնաժողովի նախագահը։

Վիզաների ազատականացում, անվտանգություն, տնտեսական զարգացում, փոխկապակցվածություն. սրանք այն հիմնական ուղղություններն են, որոնց շուրջ  Եվրամիությունը պատրաստ է զարգացնել իր հարաբերությունները Հայաստանի հետ, և որոնց էլ անդրադարձել է Ուրսուլա ֆոն դեր Լայենը: