Հայկ Մամիջանյան. Հայաստանում տեղի ունեցողը կապ չունի եվրոպական արժեքների հետ

Հայաստանում ընթացող քրեական հետապնդումները կապ չունեն եվրոպական արժեքների հետ, լրագրողների հետ զրույցում հայտարարել է ԱԺ «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով իշխանության քաղաքական ընդդիմախոսների նկատմամբ իրականացվող գործողություններին։

Մամիջանյանը շեշտել է, որ ՀՀԿ փոխնախագահ Արմեն Աշոտյանը քաղբանտարկյալ է, ինչը փաստել եվ նրա անհապաղ ազատ արձակումն է պահանջել Եվրոպայի ժողովրդական կուսակցությունը (ԵԺԿ)։ Պատգամավորի խոսքով՝ ուշագրավ է, որ իշխող «Քաղաքացիական պայմանագիր» կուսակցությունն այժմ ձգտում է անդամակցել հենց այն կառույցին, որը ճանաչել է Հայաստանում քաղբանտարկյալների գոյության փաստը։

Հիշեցնենք, որ դատարանն այս պահին քննում է Արմեն Աշոտյանի կալանքը եվս երկու ամսով երկարաձգելու վերաբերյալ քննիչի միջնորդությունը։