Հենց Փաշինյանի կառավարությունն է ձախողել եվրաինտեգրացիայի ուղղությունը․ Լևոն Զուրաբյան

Եվրաինտեգրացիայի ուղղությունը, առնվազն տնտեսական հիմքերի առումով, ձախողել է հենց Հայաստանի վարչապետ Նիկոլ Փաշինյանի գլխավորած կառավարությունը։ Ֆեյսբուքյան իր էջում հրապարակված տեսանյութում ասում է ՀԱԿ փոխնախագահ, կուսակցության վարչապետի թեկնածու Լևոն Զուրաբյանը։

 

Ըստ Զուրաբյանի՝ թեպետ հայտարարվում է դեպի Եվրոպա գնալու մասին, իսկ դա նշանակում է, թե մեր արտադրանքը պետք է բարձրացնենք եվրոպական ստանդարտներին և մտնենք եվրոպական շուկա, լրիվ հակառակ պատկերն ենք տեսնում։ Նրա խոսքով՝ եթե 2018թ․ Ռուսաստանի բաժնեմասը մեր երկրի արտահանման ծավալում 27 տոկոս էր, դրանից հետո կտրուկ աճել է՝ 2022թ․-ին հասնելով 47 տոկոսի։ Ու նման պայմաններում այսօր մեծ թվով արտահանողներ բավականին ծանր դրության մեջ են հայտնվել՝ Ռուսաստանի կողմից մտցված սահմանափակումների պատճառով։ Որոշ մարդիկ արդեն սնանկացման եզրին, փոքր և միջին բիզնեսը մեծ հարված է ստացել։

Հունվարից ապրիլ արտահանման ծավալը 3,3 տոկոսով նվազել է։ Վերջինիս խոսքով՝ վերջին սահմանափակումների հաշվարկը շատ ավելի ցավոտ է լինելու և ավելի մեծ խնդիրներ է առաջացնում։

 

«Սա Նիկոլ Փաշինյանի չհաշվարկված, եթե չասեմ՝ հիմար քաղաքականության հետևանքն է»,- հայտարարեց Զուրաբյանը։

Վստահ է, որ հիմա ստեղծված իրավիճակը ճանապարհ է դեպի տնտեսական ճգնաժամ։
Զուրաբյանը կարծում է, որ այս «կուրսը» ոչ միայն սխալ, չհաշվարկված քաղաքականության հետևանք է, այլև նախընտրական բաղադրիչներ ունի։ Փաշինյանը ցանկանում էր ընտրություններից առաջ Արևմուտքի աջակցությունը ստանալ։