ՀՀ հաջորդ վարչապետը լինելու է Սամվել Կարապետյանը. Ալիկ Ալեքսանյան

Ազգային ժողովի հրատապ նիստին քննարկվեց Ընտրական օրենսգրքում լրացումներ և փոփոխություններ կատարելու հարցը: Նախագիծն ընդունվեց առաջին ընթերցմամբ: Կողմ քվեարկեց 66, դեմ՝ 16 պատգամավոր:

Փոփոխությամբ «Քաղաքացիական պայմանագրի» պատգամավորներն առաջարկում են սահմանել, որ կուսակցությունների դաշինքի անվանումը չի կարող պարունակել անձնանուն, պետական և տեղական ինքնակառավարման մարմինների անուններ կամ դրանց շփոթելու աստիճան նման անվանումներ կամ դրանց հոլովաձևեր։ Դաշինքի անունը չի կարող պարունակել նաև վիրավորական կամ զրպարտչական բնույթի բառեր կամ այլ արտահայտություններ։

«Ամիսներ շարունակ ՔՊ-ն կռիվ էր տալիս Սամվել Կարապետյանի նկարի հետ, հիմա էլ կռիվ են տալիս անվան հետ: Փաշինյանն ամեն կերպ փորձում է վախեցնել ժողովրդին: Այս մարդիկ պետք է հասկանան, որ հաջոդ վարչապետը լինելու է Սամվել Կարապետյանը: Ժողովուրդը հասկացել է, որ միայն Սամվել Կարապետյանը կարող է դրական փոփոխություններ բերել, այս է պատճառը իշխանության պանիկայի: ՔՊ-ից ամեն ինչ սպասելի է, բայց մեր ժողովրդին չեն կարող ո՛չ վախեցնել, ո՛չ հետ պահել փոփոխություններից»,- այս մասին լրագրողների հետ զրույցում ասել է  «Ուժեղ Հայաստան» կուսակցության խորհրդի անդամ Ալիկ Ալեքսանյանը: