Հուլիս ամսվա ընթացքում կնշանակվի «Արարատցեմենտի» կառավարիչը․ Պապոյան

Հակակոռուպցիոն դատարանի որոշմամբ և Գլխավոր դատախազության միջնորդության հիման վրա «Արարատցեմենտ» ընկերությունը հանձնվել է ՀՀ պետական կառավարմանը՝ ի դեմս էկոնոմիկայի նախարարության։ Այս մասին սոցցանցի իր էջում հայտնել է ՀՀ էկոնոմիկայի նախարար Գևորգ Պապոյանը։

Գերատեսչության ղեկավարի փոխանցմամբ՝ հուլիս ամսվա ընթացքում, սահմանված կարգով, կնշանակվի ընկերության նոր կառավարիչը։

Մինչ այդ նախարարը դիմել է գործարանի աշխատակիցներին՝ հորդորելով բարեխղճորեն և պատասխանատվությամբ կատարել իրենց պարտականությունները, որպեսզի չառաջանան աշխատանքից ազատման, վարչական կամ քրեական պատասխանատվության ենթարկման հիմքեր։ Պապոյանը վստահեցրել է, որ իրենց գործին պարտաճանաչ ու բարեխիղճ մոտեցող բոլոր աշխատակիցները կշարունակեն իրենց աշխատանքը։