«Իրազեկ քաղաքացիների միավորումը» պատրաստակամություն է հայտնում հաշվարկել առաջիկա հանրահավաքների մասնակիցների թիվը

 «Իրազեկ քաղաքացիների միավորում» (ԻՔՄ) հասարակական կազմակերպությունը հայտարարություն է տարածել՝ ուղղված քաղաքական կուսակցություններին և առաջիկա մեկ ամսվա ընթացքում հանրահավաքներ նախատեսող ուժերին։ Կազմակերպությունը մտադիր է իրականացնել մասնակիցների քանակի գերճշգրիտ հաշվարկ՝ կիրառելով սեփական մեթոդաբանությունը (օդային նկարահանում և անհատական հաշվարկ)։

Հաշվի առնելով սպասվող միջոցառումների մեծ քանակը՝ ԻՔՄ-ն առաջարկում է կուսակցություններին համագործակցել՝ հաշվարկի առավելագույն թափանցիկությունն ու ընդգրկվածությունն ապահովելու համար.

•  Որպեսզի ոչ մի հավաք դուրս չմնա կազմակերպության տեսադաշտից, կազմակերպիչներին առաջարկվում է առնվազն 24 ժամ առաջ տեղեկացնել սպասվող միջոցառման մասին։

•  Շահարկումներից խուսափելու նպատակով՝ ԻՔՄ-ն պատրաստ է նկարահանումն իրականացնել հենց կազմակերպիչների կողմից մատնանշված ժամին, երբ մասնակիցների թիվը հասնում է առավելագույնի։

• . Կուսակցությունները կարող են նաև տրամադրել սեփական դրոնով արված կադրերը, եթե դրանք համապատասխանեն սահմանված որակական և տեխնիկական չափանիշներին (ուղղահայաց նկարահանում և բարձր որակ)։

Կազմակերպությունը վերահաստատում է, որ ներկայացվող թվերը լինելու են գերճշգրիտ՝ առավելագույնը 10% հնարավոր շեղմամբ։ Հաշվարկի գործընթացի նկատմամբ վստահությունն ապահովելու համար ԻՔՄ-ն պատրաստ է իր գրասենյակում հյուրընկալել կազմակերպիչներին և ցուցադրել հաշվարկի ողջ տեխնիկական ընթացքը։