Կառավարությունը հաստատեց TRIPP համաձայնագրի վավերացման նախագիծը

ՀՀ կառավարությունն այսօրվա նիստում հաստատեց Հայաստանի և ԱՄՆ-ի միջև «Թրամփի ուղի՝ հանուն միջազգային խաղաղության և բարգավաճման» (TRIPP) ռազմավարական համագործակցության շրջանակային համաձայնագիրը վավերացնելու մասին նախագիծը։

Համաձայնագիրը ստորագրվել է 2026 թվականի հունիսի 1-ին Վաշինգտոնում և հունիսի 4-ին Երևանում։ Կառավարության այսօրվա որոշումից հետո նախատեսվում է դիմել Սահմանադրական դատարան՝ պարզելու փաստաթղթում ամրագրված պարտավորությունների համապատասխանությունը երկրի Մայր օրենքին։

Եթե ՍԴ-ն տա դրական եզրակացություն, նախագիծը կփոխանցվի Ազգային ժողովի վավերացմանը։ Սահմանադրական դատարանում կառավարության ներկայացուցիչն է լինելու ԱԳ նախարարի տեղակալ Վահան Կոստանյանը։

«TRIPP-ի հիմնադրման փաստաթղթային գործընթացն ավարտելու համար դեռևս առջևում ունենք երկու փաստաթուղթ` բաժնետերերի միջև պայմանագիրը և TRIPP զարգացման ընկերության կանոնադրությունը։ Այժմ աշխատում ենք այս փաստաթղթերի վրա»,- հայտարարեց ՀՀ արտաքին գործերի նախարար Արարատ Միրզոյանը։

Նախագծով Հայաստանն ու ԱՄՆ-ն հիմնադրում են TRIPP զարգացման ընկերություն, որը ՀՀ տարածքի տարբեր գոտիներում առանձին նախագծերի համար կկարողանա հիմնել հատուկ նշանակության ընկերություններ։

Հիմնական պայմանները.

•  Ընկերությունը նշված գոտիներում կստանա հողօգտագործման և կառուցապատման իրավունք:

•  Իրավունքը կգործի նախնական 49 տարով: Այս ընթացքում բաժնեմասերը կբաշխվեն հետևյալ համամասնությամբ.

  • ԱՄՆ՝ 74%,

  • Հայաստան՝ 26%:

• 49 տարին լրանալուց հետո գործակցությունը ևս 50 տարով երկարաձգելու հնարավորություն կա։ Այդ դեպքում ՀՀ բաժնեմասը կավելանա՝ կազմելով 49%:

Ավելի վաղ՝ սեպտեմբերի 11-ին, ՀՀ վարչապետ Նիկոլ Փաշինյանը հստակեցրել էր, որ Հայաստանը ոչ թե 99 տարով հողն է վարձակալության տալիս ամերիկյան կողմին, այլ տրամադրում է բացառապես կառուցապատման իրավունք։

«Թրամփի ուղի» (TRIPP) նախագծի հիմքերը դրվել են 2025 թվականի օգոստոսի 8-ին Վաշինգտոնում, որտեղ ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը ստորագրեցին 7 կետից բաղկացած համատեղ հռչակագիր։

Այն նախատեսում է Հայաստանի հարավային հատվածով (Սյունիքի մարզ) ստեղծել ռազմավարական տարանցիկ ճանապարհ, որն Ադրբեջանին առևտրային հասանելիություն կապահովի դեպի Նախիջևան: Զուգահեռաբար, ԱՄՆ-ի և երկրների ղեկավարների ներկայությամբ Հայաստանի ու Ադրբեջանի արտգործնախարարները նախաստորագրել են երկու երկրների միջև խաղաղության և միջպետական հարաբերությունների հաստատման մասին համաձայնագիրը։

ԱԳ նախարար Արարատ Միրզոյանը վերահաստատեց, որ այս խոշորագույն նախագիծը կնպաստի տարածաշրջանային ու գլոբալ առևտրի զարգացմանը, ինչպես նաև Հարավային Կովկասում կայուն խաղաղության հաստատմանը։