ԿԸՀ–ի որոշումները կասկածի տակ են դնում ընտրությունների արդարությունը․ Իվետա Տոնոյան

«Բարգավաճ Հայաստան» կուսակցության  մամուլի խոսնակ Իվետա Տոնոյանի  խոսքով՝  նախօրեին ուշ գիշերով, «ծածուկ պայմաններում», ՀՀ կենտրոնական ընտրական հանձնաժողովը  որոշում է կայացրել երկու ընտրատեղամասերում ընտրությունների արդյունքները անվավեր ճանաչելու վերաբերյալ, այս մասին նա ասել է ԲՀԿ անդամների ասուլիսի ժամանակ։

Նրա գնահատմամբ՝ այդ քայլը իրականացվել է «օրինականության սահմանները խախտելով» և նպատակ ունի խոչընդոտել ԲՀԿ-ի մուտքը Ազգային ժողով։ Կուսակցության ներկայացուցիչը պնդում է, որ տեղի ունեցած գործընթացները լուրջ ազդեցություն են ունեցել ընտրական արդյունքների վրա և կասկածի տակ են դնում ընտրությունների արդարությունն ու թափանցիկությունը։

Խոսնակի խոսքով՝ ընտրությունների գիշերը արձանագրվել են քվեների հաշվարկի փոփոխություններ, իսկ վաղ առավոտյան հրապարակված տվյալներով ԲՀԿ-ն անցել է անցողիկ շեմը, սակայն հետագայում թվային տվյալներում փոփոխությունների արդյունքում այլ պատկեր է ձևավորվել։

Նա նաև նշել է, որ վերահաշվարկների ընթացքում որոշ ընտրատեղամասերում հայտնաբերվել են անճշտություններ, որոնց արդյունքում կուսակցությունը, ըստ նրա, կրկնակի չափով վերականգնել է անհրաժեշտ ձայները՝ անցողիկ շեմը հաղթահարելու համար։

ԲՀԿ-ի ներկայացուցիչը պնդում է, որ ԿԸՀ-ի վերջին որոշումները, մասնավորապես հանձնաժողովի ղեկավար Վահագն Հովակիմյանի գլխավորությամբ, նպատակ ունեն թույլ չտալ կուսակցությանը հաղթահարել անցողիկ շեմը և ստանալ մանդատներ Ազգային ժողովում։