Խորհրդարանում մեկնարկել է հերթական նիստը

ՀՀ Ազգային ժաղովի մամուլի ծառայությունից տեղեկանում ենք, որ Ազգային ժողովն ապրիլի 14-ին գումարել է հերթական նիստերը: Մինչ օրակարգային հարցերին անցնելը, ՀՀ ԱԺ նախագահ Ալեն Սիմոնյանը տեղեկացրել է, որ Կենտրոնական ընտրական հանձնաժողովը ներկայացրել է ԱԺ պատգամավոր ընտրված եւ լիազորությունները վաղաժամկետ դադարեցրած պատգամավորի մանդատը հաջորդ թեկնածուին տրամադրելու մասին թիվ 30 արձանագրությունը, ըստ որի՝ մանդատը տրվում է «Հայաստան» կուսակցությունների դաշինքի ընտրական ցուցակի առաջին մասի հերթական հաջորդ թեկնածու Գագիկ Համբարձումյանին:

«ԱԺ կանոնակարգ» սահմանադրական օրենքի 33-րդ հոդվածի 4-րդ մասի համաձայն՝ Ազգային ժողովի կազմը համալրած պատգամավոր Գագիկ Համբարձումյանը երդվել է:

ԱԺ պատգամավոր Հայկ Սարգսյանի հեղինակած «Զինվորական ծառայության եւ զինծառայողի կարգավիճակի մասին» օրենքում եւ կից օրենքներում փոփոխություններ նախատեսող օրենսդրական փաթեթը խորհրդարանի որոշմամբ չի ընդգրկվել նստաշրջանի օրակարգ:

Այնուհետեւ խորհրդարանը հաստատել է հերթական նիստերի օրակարգը: