Կոբախիձեն հայտարարել է, որ ԱՄՆ-ն Հայաստանի և Ադրբեջանի հետ հարաբերությունները վերականգնել է առանց նախապայմանների

Վրաստանի վարչապետ Իրակլի Կոբախիձեն, խոսելով ԱՄՆ-ի հետ հարաբերությունների հնարավոր վերականգնման մասին, հիշատակել է Հայաստանի և Ադրբեջանի հետ Վաշինգտոնի համագործակցությունը՝ ընդգծելով, որ այդ երկրների դեպքում նախապայմաններ չեն դրվել, այս մասին հայտնում են վրացական լրատվամիջոցները։

«Ամերիկայի Միացյալ Նահանգները վերականգնել է իր գործընկերությունը մեր հարևան երկրների հետ՝ այն տեղափոխելով այլ մակարդակի։ Դա Ադրբեջանն է, դա Հայաստանն է։ Այնտեղ նախապայմաններ չկային։ Ո՛չ բանտարկյալների ազատ արձակումը, ո՛չ էլ որևէ այլ բան։ Նման նախապայմաններ չկային։ Նույնիսկ ընդդիմության վերաբերյալ»,- հայտարարել է Կոբախիձեն։

Վրաստանի վարչապետը նշել է, որ եթե Վրաստանի նկատմամբ կիրառվեն կրկնակի չափանիշներ, դա «շատ տխուր կլինի»։

Անդրադառնալով ԱՄՆ-ի և Վրաստանի ռազմավարական գործընկերության դադարեցմանը՝ Կոբախիձեն ասել է, որ այն տեղի է ունեցել «անարդարության պատճառով»։

«Այն դադարեցվել է, քանի որ մենք չենք ներգրավվել պատերազմի մեջ և երկրորդ ճակատ չենք բացել։ Ահա թե ինչու նախորդ վարչակազմը դադարեցրել է այն»,- հավելել է նա։

Խոսելով Վրաստանի ընդունած օրենքների մասին՝ վարչապետը շեշտել է, որ հարևան երկրների օրենսդրությունը որպես օրինակ ներկայացնելը «շատ թույլ փաստարկ» է։

«Դուք տեսնում եք, որ այս փաստարկները բացարձակապես թույլ են։ Երբ մեզ ասում են, որ մեր հարևան երկրներն ունեն Վրաստանից ավելի լավ օրենքներ, սա շատ թույլ փաստարկ է։ Հետևաբար, եթե մենք տեսնենք կրկնակի չափանիշներ, դա շատ տխուր կլինի, բայց մենք հույս ունենք, որ մոտեցումը չի լինի անարդար, այլ արդար մոտեցում։ Այն, ինչ փչացել է անարդար մոտեցմամբ, կարող է բարելավվել միայն արդար մոտեցմամբ»,- ասել է Կոբախիձեն։