Կոնստանտին Զատուլինը՝ Թբիլիսիում անցկացված հանրահավաքի մասին

Պետդումայի ԱՊՀ երկրների հարցերով և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը «Газета.Ru»-ին հայտնել է, որ Թբիլիսիում անցկացված հանրահավաքը՝ ի պաշտպանություն ռուս զբոսաշրջուհուն ծեծի ենթարկած տղամարդու, վնասում է Վրաստանի հեղինակությանը։

«Անկախ նրանից, թե ինչ ազգության կամ քաղաքացիության է տուժածը, նրան վնաս պատճառած անձը պետք է պատասխանատվության ենթարկվի։ Կասկած չկա, որ նրանք, ովքեր փորձում են արդարացնել նրան, իրականում վնասում են հենց Վրաստանի հեղինակությանը։ Իմ կարծիքով՝ չպետք է այդ անձի ընկերների կամ աջակիցների վարքագիծը վերագրել Թբիլիսիի բոլոր բնակիչներին կամ ամբողջ Վրաստանին»,-ասել է Զատուլինը։

Զատուլինի խոսքով՝ եթե ռուսաստանցի զբոսաշրջիկի վրա հարձակված Վրաստանի քաղաքացին իսկապես մեղավոր է, սակայն չի պատժվի միայն այն պատճառով, որ «իրենց մարդն է», ապա այդ իրավիճակը «կազդի Ռուսաստանի այն քաղաքացիների որոշման վրա, որոնք ծրագրում էին մեկնել Վրաստան»։

Հիշեցնենք՝ հուլիսի 19-ին Վրաստանի Կախեթիի շրջանում մի տղամարդ ներխուժել է ռուսաստանցի զբոսաշրջիկների հյուրանոցի համար և հարձակվել նրանցից մեկի վրա։ Նա կոտրել է աղջկա քիթը, և վերջինս այժմ ծանր վիճակում գտնվում է հիվանդանոցում։

Վրաստանի Ներքին գործերի նախարարությունը հայտնել է, որ միջադեպի պատճառը, ըստ իրենց տվյալների, եղել է զբոսաշրջիկների պահվածքը. նրանք, իբր, վիրավորել են հյուրանոցում անցկացվող հարսանիքի մասնակիցներին և ջուր են լցրել երաժշտական սարքավորումների վրա։ Սակայն զբոսաշրջիկները հերքում են այդ վարկածը։ Նրանց խոսքով՝ վեճը սկսվել է այն պատճառով, որ իրենք խոսում էին ռուսերեն։ Միաժամանակ հաղորդվել է, որ Թբիլիսիում անցկացվել է երթ՝ ի պաշտպանություն այն տղամարդու, ով կոտրել էր ռուսաստանցի աղջկա քիթը։ Մասնակիցները դուրս էին եկել փողոցներ՝ հնչեցնելով հակառուսական կարգախոսներ։