Կրեմլում ափսոսում են, որ Հայաստանը շարունակում է «երկու աթոռի վրա նստելու» փորձերը

Երևանը շարունակում է պահպանել «երկու աթոռի վրա նստելու» քաղաքականությունը, ասել է Ռուսաստանի նախագահի օգնական Յուրի Ուշակովը՝ անդրադառնալով Երևանում տեղի ունեցող իրադարձությունները, այդ թվում՝ Եվրոպական քաղաքական համայնքի գագաթնաժողովը։

«Ցավոք, Երևանում փորձում են նախկինի պես պահպանել «երկու աթոռի վրա նստելու» քաղաքականությունը։ Ես չգիտեմ, թե որքան կարող է սա շարունակվել»,-ասել է Ուշակովը։

Նա պատասխանել է «Ինտերֆաքս»-ի հարցին, թե Մոսկվայում ինչպե՞ս են ընկալել Երևանում անցկացված վերջին միջոցառումները, այդ թվում՝ Հայաստանի և Մեծ Բրիտանիայի միջև ռազմավարական գործընկերության մասին հռչակագրի ստորագրումը, և արդյո՞ք Կրեմլում դա չեն դիտարկում որպես Ռուսաստանի հետ համագործակցության խզման ճանապարհ։