Կրեմլում հայտնել են, որ Ուկրաինայի հարցում Ալիևի դիրքորոշումը սխալ է

ՌԴ նախագահի խոսնակ Դմիտրի Պեսկովը հայտարարել է, որ Կրեմլում սխալ են համարում Ադրբեջանի նախագահ Իլհամ Ալիևի դիրքորոշումն Ուկրաինայի հարցում։ Միաժամանակ նա ընդգծել է, որ դա պատճառ չէ ստվեր գցելու երկու երկրների հարաբերությունների վրա, փոխանցում է РБК-ը։

«Ինչ վերաբերում է նախագահ Ալիևի արտահայտած դիրքորոշմանը, ապա կան մի շարք պետություններ, որոնց հետ մեզ կապում են սերտ հարաբերություններ, և որոնք կիսում են նման դիրքորոշում՝ մի դիրքորոշում, որի հետ մենք կտրականապես համաձայն չենք։ Այո՛, սա մեր միջև առկա տարաձայնությունների առարկան է։ Սակայն մենք կարծում ենք, որ այդ հարցը չպետք է որևէ կերպ ստվերի մեր երկկողմ հարաբերությունները»,–ասել է Պեսկովը։

Նա հավելել է, որ Մոսկվան շարունակում է առաջնորդվել պրագմատիկ մոտեցմամբ և մտադիր է համակողմանիորեն զարգացնել հարաբերությունները Ադրբեջանի հետ՝ միաժամանակ հետևողականորեն և հիմնավորված ներկայացնելով իր դիրքորոշումը Ուկրաինայի հարցի վերաբերյալ։