Լեհաստանը պատրաստ է փակել Ռուսաստանի և Բելառուսի հետ բոլոր սահմանային անցակետերը

Լեհաստանը պատրաստ է փակել Ռուսաստանի և Բելառուսի հետ բոլոր սահմանային անցակետերը, լրագրողներին ասել է Լեհաստանի փոխվարչապետ և ազգային պաշտպանության նախարար Վլադիսլավ Կոսինյակ-Կամիշը։

«Մենք պատրաստ ենք, անհրաժեշտության դեպքում, փակել արևելյան սահմանի բոլոր սահմանային անցակետերը։ Մենք արդեն ունենք դրա համար անհրաժեշտ սարքավորումները», - ասել է Կոսինյակ-Կամիշը։ Այս մասին գրում են ռուսական լրատվամիջոցները։
Նա հավելել է, որ լեհական անվտանգության ուժերն արդեն ունեն «պահեստներ, ամրաշինություններ» այդ նպատակով։

Լեհ նախարարը պարզաբանել է, որ այդ պաշարները կուտակվում են «Արևելյան վահան» ծրագրի շրջանակներում։
Իր հերթին, ազգային պաշտպանության փոխնախարար Չեզարի Տոմչիկը հայտարարել է, որ Լեհաստանը պատրաստ է փակել Ռուսաստանի և Բելառուսի հետ սահմանային անցակետերը 7-14 օրվա ընթացքում։ Նա հավելել է, որ Լեհաստանը ականներ է գնում այդ նպատակով, ի թիվս այլ բաների։
«Մենք մի քանի հազար ական ենք գնում, որպեսզի դրանք պատրաստ լինեն հնարավոր տեղակայման», - ասել է փոխնախարարը։

Լեհաստանը «Արևելյան վահան» ծրագիրը ստեղծել է 2024 թվականին, որի շրջանակներում չորս տարվա ընթացքում նախատեսվում է հատկացնել 2.5 միլիարդ դոլար։ Լեհական իշխանությունները մտադիր են այս ծրագիրն օգտագործել Ռուսաստանի և Բելառուսի հետ սահմանի արևելյան կողմում ռազմական ենթակառուցվածքներ ստեղծելու համար։