Լրտեսին միանգամից բռնելը գրագետ չի. մենք էլի լրտեսության գործ ունենք. Փաշինյան

Գործի օպերատիվ հատվածն իրականացրել է վարչապետին ենթակա մարմինը՝ ԱԱԾ-ն, բնականաբար, ես բոլոր մանրամասներին կարող եմ տեղյակ լինել, լրագրողների հետ զրույցում, անդրադառնալով ԲՀԿ պատգամավորի թեկնածու Անդրանիկ Թևանյանին հասցեագրվող մեղադրանքին, ասել է ՀՀ վարչապետ Նիկոլ Փաշինյանը։

 Լրագրողը Նիկոլ Փաշինյանից հետաքրքրվեց, թե արդյո՞ք քաղաքական  հրահանգ չի եղել իրավապահ մարմիններին, քանի որ ինքը խոսեց այդ մասին քարոզարշավին, այնուհետև ՔԿ-ն նման տվյալներ հրապարակեց։

«Երբ լրտեսական գործ է բացահայտվում, դա ունի օպերատիվ որոշակի հետաքննություն։ Մենք հիմա էլ լրտեսության գործ ունենք, բայց նրանց չենք բռնում մի պարզ պատճառով, քանի որ մենք օպերատիվ հետևում ենք, որպեսզի ցանցերը բացահայտվեն, գործելակերպերը բացահայտվեն, էլ չեմ ասում՝ լրտեսի ստացած հանձնարարությունները մեզ տեղեկություն են տալիս մեր դեմ իրականացվող հետախուզության մասին։ Ձերբակալման որոշում կայացվում է այն ժամանակ, երբ հետաքրքրությունը սպառվում է։ Լրտեսին միանգամից բռնելը գրագետ չի, պետք է թողնել, որպեսզի իր կապերը տեսնենք»,-նշել է նա։