Մեր քաղաքացիները «օքե՞յ» են նրա հետ, որ Ալիևը տեսակապով Երևանում հաթաթա տա այն մարդկանց, ովքեր խոսում են հայ գերիների մասին. Մամիջանյան

Փաշինյանն ամեն ինչ անում է, որպեսզի Եվրոպական քաղաքական համայնքի 8-րդ գագաթնաժողովը ներկայացնի որպես իր քարոզարշավի մի մաս, լրագրողների հետ զրույցում նշել է «Հանրապետական» կուսակցության անդամ Հայկ Մամիջանյանը։

«Դրան աջակցում են նաև իր որոշ եվրոպական տերերը։ Մենք հավաքվել ենք նրա համար, որ դա թույլ չտանք»,-ասել է Մամիջանյանը։

Նա ասել է, թե նախկինում Ալիևը հեռախոսով էր հանձնարարականներ տալիս Փաշինյանին.

«Այսօր Երևանում տեսակապով միացրեցին Ալիևին ու ինքը հաթաթա էր տալիս այն մարդկանց, ովքեր խոսում են մեր գերիների, արցախահայերի իրավունքների մասին։ Մի հարց ունեմ մեր քաղաքացիներին, իրենք դրա հետ «օքե՞յ» են։ Հայաստանում կա՞ որևէ մի մարդ, որը նորմալ է համարում, որ Ալիևը տեսակապով հանձնարարականներ տա»,-հարցադրում արեց Հայկ Մամիջանյանը՝ նշելով, որ թե ինքը, իր ընկերները ու շատ այլ մարդիկ դրա հետ «օքեյ» չեն։