Մեծ սիրով կողջունենք ՀՀ մեծարգո վարչապետի այցն Իրան, որտեղ կկարողանան ստորագրել ռազմավարական գործընկերության փաստաթուղթը. դեսպան

Հայ-իրանական գործընկերության ինստիտուցիոնալացման ուղղությամբ կողմերի կամքն ու ցանկությունը վճռական են, և այս պահին ընթանում են ռազմավարական գործընկերության համապարփակ փաստաթղթի տեքստի մշակման աշխատանքները։ Այս մասին տեղի ունեցած մամուլի ասուլիսի ժամանակ հայտարարել է Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Խալիլ Շիրղոլամին։

Դեսպանն ընդգծել է, որ երկկողմ հարաբերությունների խորացման կարևորությունը վերահաստատվել է անցյալ շաբաթ Իրանում տեղի ունեցած բարձր մակարդակի հանդիպման ընթացքում։

ԻԻՀ նախագահ Մասուդ Փեզեշքիանը ՀՀ վարչապետ Նիկոլ Փաշինյանի հետ հանդիպման շրջանակում ևս մեկ անգամ շեշտել է գործընթացի կարևորությունը և հնարավորինս արագ արդյունքների հասնելու անհրաժեշտությունը։ Ըստ Շիրղոլամիի՝ Թեհրանը հետամուտ է փաստաթղթի շուտափույթ ստորագրմանը և վճռականորեն շարունակում է քայլերը այդ ուղղությամբ։

Անդրադառնալով իրավական փաստաթղթի պատրաստման ընթացքին՝ դեսպանը նշել է, որ տեքստն այս պահին գտնվում է ուսումնասիրության և կազմման փուլում։

«Հուսով եմ՝ հնարավորինս արագ այս փուլը կավարտենք և կսկսենք աշխատանքները ստորագրման ուղղությամբ։ Հնարավորինս պետք է աշխատենք այս փաստաթղթի ամփոփման և վերջնական տեսքի բերման համար։ ԻԻՀ-ն մեծ սիրով կողջունի ՀՀ մեծարգո վարչապետ Նիկոլ Փաշինյանի այցը ԻԻՀ, որտեղ կկարողանան ստորագրել այս փաստաթուղթը»,- հայտարարել է դիվանագետը։

Իրանական կողմի համոզմամբ՝ համապարփակ փաստաթղթի ստորագրմամբ նոր մթնոլորտ կստեղծվի երկկողմ հարաբերություններում և նոր պատուհան կբացվի հետագա փոխգործակցության համար։

Սպասվող պայմանագրով հստակ ուղենիշներ կսահմանվեն մի շարք առանցքային ոլորտներում, այդ թվում՝

• Քաղաքական և անվտանգային,

• Տնտեսական և ներդրումային,

• Պաշտպանական։