Միրզոյան․ ԹՐԻՓՓ-ը կարող է գործարկվել մինչև խաղաղության պայմանագրի ստորագրումը

ԹՐԻՓՓ նախագիծը կարող է գործարկվել մինչև Հայաստանի և Ադրբեջանի միջև խաղաղության պայմանագրի ստորագրումը։ Այս մասին այսօր Ազգային ժողովում հայտարարել է արտգործնախարար Արարատ Միրզոյանը՝ պատասխանելով «Ուժեղ Հայաստան» խմբակցության ղեկավար Նարեկ Կարապետյանի հարցին։

Ազգային ժողովում քննարկվում է Հայաստանի և ԱՄՆ-ի միջև «Թրամփի ուղի՝ հանուն միջազգային խաղաղության և բարգավաճման» (TRIPP) նախագծի վերաբերյալ ռազմավարական համագործակցության շրջանակային համաձայնագրի վավերացման հարցը։

Քննարկման ընթացքում Նարեկ Կարապետյանը հետաքրքրվել է՝ հնարավո՞ր է արդյոք ԹՐԻՓՓ-ը գործարկել մինչև խաղաղության պայմանագրի ստորագրումը։ Ի պատասխան՝ Միրզոյանը նշել է, որ դա հնարավոր է՝ հիշեցնելով, որ պայմանագիրն արդեն նախաստորագրվել է, իսկ Հայաստանն ու Ադրբեջանը հրապարակայնորեն հանձնառություն են ստանձնել։

Արտգործնախարարի խոսքով՝ ԹՐԻՓՓ-ի գործարկման համար անհրաժեշտ նախապայմանը խաղաղությունն է, որն իր գնահատմամբ՝ արդեն հաստատված է։

«Մենք ունենք հաստատված խաղաղություն, իսկ գուցե ԹՐԻՓՓ-ը լինի՞ և մոտեցնի խաղաղությունը», — ասել է Միրզոյանը՝ հավելելով. «Որպես իրողություն՝ պայմանը, միջավայրը, որ պետք է լինի, որպեսզի ԹՐԻՓՓ-ը գործարկվի, կա․ դրա անունն է խաղաղություն»։

Նարեկ Կարապետյանը, սակայն, կասկած է հայտնել, որ ԹՐԻՓՓ-ի գործարկումից հետո Ադրբեջանը կբացի նաև Հայաստանի համար նախատեսված ճանապարհները։ Ընդդիմադիր պատգամավորը հարցրել է՝ եթե Բաքուն նախագծի միջոցով արդեն իսկ ապահովի կապը Նախիջևանի հետ, ի՞նչ շահագրգռվածություն կունենա մյուս պայմանավորվածությունները կատարելու հարցում։

Ի պատասխան՝ Միրզոյանը նշել է, որ պատգամավորի դիտարկումը հաշվի չի առնում նախագծի ավելի լայն աշխարհագրական և տնտեսական նշանակությունը։

«Ձեր հայացքն աշխարհագրորեն կիսատ է, ԹՐԻՓՓ-ը հո առանձնացված չի գործելու», — հակադարձել է նախարարը՝ ընդգծելով, որ նախագծի իրականացման երաշխիքը դրա փոխշահավետությունն է Հայաստանի, Ադրբեջանի և երրորդ երկրների համար։

«Հնարավոր չէ, որ Ադրբեջանը բեռ տեղափոխի Նախիջևան, և հնարավոր չլինի Հայաստանի համար այդ նույն շարժը», — ասել է Միրզոյանը։

Համաձայնագրի քննարկման համար խորհրդարանում հատկացվել էր երկու ժամ։ Թեև արտգործնախարարին հարց ուղղելու համար հերթագրվել էր 27 պատգամավոր, ժամանակի սահմանափակման պատճառով հարցեր տալու հնարավորություն է ստացել նրանցից միայն երեքը՝ խորհրդարանական յուրաքանչյուր խմբակցությունից մեկական պատգամավոր։