Նիկոլ Փաշինյան․ Ռուսական ռազմաբազան դուրս բերելու հարց չի քննարկվել

 Հայաստանի իշխանությունները երբեք չեն բարձրացրել Գյումրիում տեղակայված ռուսական 102-րդ ռազմաբազան դուրս բերելու հարցը, լրագրողների հետ ճեպազրույցում հայտարարել է ՀՀ վարչապետ Նիկոլ Փաշինյանը։

Կառավարության ղեկավարի խոսքով՝ հայկական կողմը ռազմաբազայի ներկայությունը կենսական անհրաժեշտություն չի համարում, սակայն այդ թեման երբևէ քննարկման առարկա չի դարձրել։ Նա ընդգծել է, որ եթե Ռուսաստանը որոշի դուրս բերել ռազմաբազան Հայաստանի տարածքից, հայկական կողմը չի առարկի, իսկ մնալու ցանկության դեպքում պատրաստ է քննարկել դա։

Ավելի վաղ ՌԴ նախագահ Վլադիմիր Պուտինը Բիշքեկում հայտարարել էր, որ եթե Հայաստանը համարի, թե ռազմաբազայի կարիքն այլևս չունի, ապա այն դուրս կբերվի երկրի տարածքից «թեկուզ վաղը»։