«Որևէ գերիշխող դիրք չկա»․ Քնարյանը՝ շաքարավազի շուկայի մասին

Հայաստանում խոշոր գործարար Հարություն Քնարյանը Armpulse-ի հետ զրույցում անդրադարձել է Ադրբեջան շաքարավազ արտահանելու հնարավորությանը՝ նշելով, որ գործընթացը դեռ գտնվում է քննարկման փուլում։

Նրա խոսքով՝ իրենց ընկերությունը ադրբեջանցի գործընկերներից ստացել է պաշտոնական նամակ, որով հետաքրքրություն է ցուցաբերվել մեծ խմբաքանակի շաքարավազ ներկրելու վերաբերյալ, և ներկայումս սպասում են ՀՀ Էկոնոմիկայի նախարարության դիրքորոշմանը։

Քնարյանը ընդգծել է, որ եթե գործընթացը բխի Հայաստանի շահերից, ապա այն կարող է իրականացվել։

Անդրադառնալով շաքարավազի շուկայի մրցակցությանը և Սամվել Ալեքսանյանի ազդեցությանը՝ գործարարը նշել է, որ ոլորտում որևէ խոչընդոտ չի հանդիպում և շուկայում չկա մեկ գերիշխող խաղացող։

«Ներկայումս Հայաստանում որևէ գործարար չի կարող ունենալ գերիշխող դիրք մյուսների նկատմամբ»,- ասել է Քնարյանը։

Նա նաև նշել է, որ իրենց ընկերությունը 2025 թվականից ակտիվ գործունեություն է ծավալում շաքարավազի ներմուծման ոլորտում և ՊԵԿ-ի կողմից ճանաչվել է որպես ռեզերվ կուտակող ընկերություն։

Քնարյանի խոսքով՝ իրենց ընկերությունը գործում է ամբողջ հանրապետությունում և շարունակում է զարգացնել պահեստային և մատակարարման ենթակառուցվածքները։