Փաշինյանը քննադատել է TRIPP-ի շուրջ երաշխավորի անհրաժեշտության մասին քննարկումները

ՀՀ վարչապետ Նիկոլ Փաշինյանը քննադատել է TRIPP ծրագրի շուրջ երաշխավորի անհրաժեշտության մասին քննարկումները՝ նշելով, որ Հայաստանի և հայ ժողովրդի պատմական փորձը նման մոտեցումների արդյունավետության վերաբերյալ մտահոգիչ օրինակներ է պարունակում։

Նիկոլ Փաշինյանն այս մասին ասել է Ազգային ժողովում՝ կառավարության հետ հարցուպատասխանի ընթացքում, պատասխանելով պատգամավոր Քնարիկ Հարությունյանի հարցին։

Պատգամավորը բարձրացրել է TRIPP-ի համաձայնագրում երաշխավորի ինստիտուտի բացակայության վերաբերյալ ընդդիմության քննադատության հարցը՝ հետաքրքրվելով, թե արդյոք երաշխավոր ներգրավելը չի ենթադրի Հայաստանի ինքնիշխանության սահմանափակում, երբ երկրի անվտանգության և տնտեսական պատասխանատվությունը դրվի երրորդ պետության վրա։

Ի պատասխան՝ վարչապետը խորհուրդ է տվել երաշխավորների անհրաժեշտության մասին խոսողներին ուսումնասիրել Հայաստանի և հայ ժողովրդի պատմությունը։

«Բոլոր նրանց, ովքեր երաշխավորներ են փնտրում, ես խորհուրդ եմ տալիս ծանոթանալ Հայաստանի վերջին տասնամյակների և հայ ժողովրդի վերջին համարյա 150 տարվա պատմությանը։ Բոլոր այն դեպքերում, երբ եղել են երաշխավորներ, դա Հայաստանի համար, հայ ժողովրդի համար ավարտվել է աղետով»,- հայտարարել է Փաշինյանը։

Վարչապետի գնահատմամբ՝ երաշխավորի անհրաժեշտության մասին քննարկումները վկայում են պատմական փորձի և ընթացիկ իրողությունների ոչ բավարար իմացության մասին։

Փաշինյանը, անդրադառնալով թեմային, հիշատակել է նաև Ուկրաինայի օրինակը՝ հարց բարձրացնելով այդ երկրի անվտանգության երաշխավորի վերաբերյալ։