Փաստաբան Վահան Հովհաննիսյանն ինքնաբացարկ է ներկայացրել «Ուժեղ Հայաստան» դաշինքի ընտրական ցուցակից

 «Ուժեղ Հայաստան» կուսակցությունների դաշինքի անդամ, փաստաբան Վահան Հովհաննիսյանը հայտարարել է քաղաքական պայքարից դուրս գալու և նախընտրական ցուցակից իր թեկնածությունը հանելու մասին։ Նա համապատասխան դիմումն արդեն ներկայացրել է Կենտրոնական ընտրական հանձնաժողով (ԿԸՀ)։

Այս մասին Վահան Հովհաննիսյանը տեղեկացրել է իր տարածած հայտարարության մեջ։

«Այսօր ինքնաբացարկի վերաբերյալ դիմում եմ ներկայացրել ԿԸՀ՝ խնդրելով ինձ հանել «Ուժեղ Հայաստան» կուսակցությունների դաշինքի նախընտրական ցուցակից»,- նշել է փաստաբանը։

Անդրադառնալով իր հետագա ծրագրերին՝ Հովհաննիսյանը հստակեցրել է, որ քաղաքական գործընթացներից դուրս գալուց հետո չի դադարեցնելու մասնագիտական աշխատանքը։ Նա մտադիր է կենտրոնանալ բացառապես մասնագիտական տիրույթում՝ շարունակելով ակտիվ գործունեություն ծավալել դատաիրավական համակարգում։

«Այսուհետ շարունակելու եմ զբաղվել իրավապաշտպանական, փաստաբանական գործունեությամբ, որի կարիքը Հայաստանում շատ է լինելու»,- հավելել է նա՝ իր խոսքն ավարտելով ազգին ուղղված մաղթանքով։