Պետք է կառավարիչ, որը գործ է անում. Նարեկ Կարապետյանը՝ Արտաշատում

«Ուժեղ Հայաստան» կուսակցության անդամներն աշխատանքային այցով այցելել էին Արտաշատ, որտեղ Օգոստոսի 23 փողոցի 43 հասցեում տեղի ունեցավ կուսակցության մարզային գրասենյակի բացումը։

Բացման արարողությանը ներկա էր կուսակցության խորհրդի անդամ Նարեկ Կարապետյանը: Նա իր ելույթը սկսեց Արտաշատի՝ որպես Հայաստանի պատմական մայրաքաղաքի նշանակության հիշատակմամբ՝ ընդգծելով, որ արտաշատցիներին անհնար է վախեցնել։

Խոսելով Արարատի մարզում առկա խնդիրների մասին՝ Կարապետյանը նշեց, որ վերջին 8 տարիներին մարզում հանցագործությունների քանակն աճել է շուրջ երեք անգամ, իսկ ծանր հանցագործություններինը՝ մոտ տասն անգամ։ «Ընդդիմությո՞ւնն է այն խնդիրը, որով պետք է զբաղվել, թե՞ հանցագործությունները։ Թե՞ այն, որ երկիրը ձեռքից գնում է։ Խնդիրը երկրի ճիշտ կառավարումն է։

Բոլոր ցանքատարածությունները կրճատվել են 35%-ով՝ բացառությամբ խաղողի և ծիրանի։ Վերջին 8 տարիներին ցորենի ցանքատարածությունները երկու անգամ նվազել են։ Առևտուրը 2024 թվականի համեմատ նվազել է, մարզը թուլանում է։ Մարզում 9000 հեկտար հող ջրի և մթերման պակասի պատճառով չի մշակվում, այգիներ չեն հիմնվում։