ՌԴ-ն պատրաստ է Հայաստանի հետ կառուցողական երկխոսության՝ ֆիտոսանիտարական հսկողության հարցով. Ալեքսեյ Օվերչուկ

Ռուսաստանը պատրաստ է Հայաստանի հետ կառուցողական երկխոսություն վարել ֆիտոսանիտարական հսկողության պահանջների կատարման շուրջ: Այս մասին «Юнашев Live» Telegram-ալիքի հետ զրույցում հայտարարել է ՌԴ փոխվարչապետ Ալեքսեյ Օվերչուկը:

ՌԴ փոխվարչապետի խոսքով՝ խնդիրը հայկական կողմից առկա որոշակի թերացումների և ֆիտոսանիտարական նորմերի պահպանման մեջ է:

«Խնդիրն այն չէ՝ [Հայաստանում] կսթափվեն, թե ոչ, այլ որ ֆիտոսանիտարական հսկողության պահանջները պետք է կատարվեն: Բնականաբար, մենք պատրաստ ենք կառուցողական երկխոսության, սակայն, ցավոք, տեսնում ենք, որ հայկական կողմից կան որոշակի խնդիրներ, և ըստ այդմ՝ նման երկխոսություն ընթանում է»,— նշել է Օվերչուկը:

 

ՌԴ փոխվարչապետը հիշեցրել է, որ ՌԴ գյուղատնտեսության նախարար Օկսանա Լուտը ՀՀ էկոնոմիկայի նախարարի հետ հանդիպմանը բարձրացրել է Հայաստանից ներկրվող մրգի և բանջարեղենի խնդիրը՝ հստակեցնելով, որ հարցը ոչ թե դրանց որակի, այլ վնասատուների և հիվանդությունների առկայության մեջ է։

Ավելի վերաբերյալ հայտնի էր դարձել, որ Երևանը մտադիր է շարունակել երկխոսությունը Մոսկվայի հետ և զարգացնել բազմոլորտ համագործակցությունը՝ արտաքին քաղաքականության հավասարակշռման և տարածաշրջանային խաղաղության ապահովման համատեքստում: