Ռոբերտ Աբիսողոմոնյանը Նյու Յորքում հանդիպել է ՄԱԿ-ի գլխավոր քարտուղարի տեղակալ Ռոզմարի ԴիԿարլոյի հետ

Կայուն զարգացման հարցերով բարձր մակարդակի քաղաքական ֆորումի շրջանակներում, հուլիսի 13-ին Նյու Յորքում հանդիպում է տեղի ունեցել ՀՀ արտաքին գործերի նախարարի տեղակալ Ռոբերտ Աբիսողոմոնյանի և ՄԱԿ-ի գլխավոր քարտուղարի՝ քաղաքական և խաղաղաշինության հարցերով տեղակալ Ռոզմարի ԴիԿարլոյի միջև։ Այս մասին հայտնում է ՀՀ արտաքին գործերի նախարարությունը։ Այս մասին հայտնում են ՀՀ ԱԳՆ–ից։

Հանդիպման ընթացքում ՀՀ ԱԳ նախարարի տեղակալը ներկայացրել է Հարավային Կովկասում հաստատված խաղաղության հետագա ամրապնդմանն ուղղված հայկական կողմի ջանքերը։ Տարածաշրջանի տնտեսական և լոգիստիկ ներուժի լիարժեք իրացման համատեքստում զրուցակիցները կարևորել են տրանսպորտային ենթակառուցվածքների զարգացմանն ու փոխկապակցվածության խթանմանն ուղղված ծրագրերի իրականացումը։

Կողմերը անդրադարձել են նաև «ՄԱԿ80» բարեփոխումների գործընթացին։ Այս առնչությամբ Ռոբերտ Աբիսողոմոնյանն ընդգծել է զարգացման համագործակցության, մարդու իրավունքների պաշտպանության և կանխարգելման օրակարգերի շրջանակներում ՄԱԿ-ի կառույցների արդյունավետ ու շարունակական գործունեության ապահովման անհրաժեշտությունը։

Բացի այդ, ԱԳ նախարարի տեղակալն ու ՄԱԿ-ի գլխավոր քարտուղարի տեղակալը քննարկել են հոկտեմբերին Հայաստանում անցկացվելիք Կենսաբազմազանության մասին կոնվենցիայի կողմերի 17-րդ համաժողովին (COP17) ընդառաջ իրականացվող նախապատրաստական աշխատանքները։

Հանդիպման ավարտին մտքեր են փոխանակվել նաև միջազգային անվտանգությանն առնչվող արդիական այլ հարցերի շուրջ։