Ռոսսելխոզնադզորը մայիսի 30-ից սահմանափակում է Հայաստանից մրգա-բանջարեղենային արտադրանքի ներմուծումը

Ռոսսելխոզնադզորը հայտարարել է, որ 2026 թվականի մայիսի 30-ից ժամանակավոր սահմանափակումներ է մտցնում Հայաստանից Ռուսաստան ներմուծվող մի շարք մրգա-բանջարեղենային ապրանքների նկատմամբ։

Սահմանափակումները վերաբերում են թարմ լոլիկին, վարունգին, պղպեղին, կանաչեղենին և ելակին։ Ռուսական կողմը պատճառաբանում է որոշումը հայկական արտադրանքի մատակարարումների ընթացքում արձանագրված խախտումներով և բուսասանիտարական ռիսկերով։

Գերատեսչության տվյալներով՝ մայիսի 21-27-ը Հայաստանում իրականացված ստուգումների ընթացքում ջերմոցային տնտեսություններում հայտնաբերվել են ԵԱՏՄ երկրների համար կարանտինային վնասատուներ։ Միայն 2026 թվականին արձանագրվել է նման 181 դեպք։

Ռոսսելխոզնադզորը նաև նշել է, որ որոշ հայկական արտահանողներ խուսափում են բուսասանիտարական վերահսկողությունից, ինչը, ըստ ռուսական կողմի, վկայում է արտահանվող արտադրանքի հետագծելիության համակարգի բացակայության մասին։