Ռուսաստանը փորձում է ազդել Հայաստանի ընտրությունների վրա՝ Փաշինյանի արևմտամետ քաղաքականությունը կանգնեցնելու համար․ գրում է Reuters–ը

Ռուսաստանը ակտիվացրել է գաղտնի ջանքերը՝ խաթարելու Հայաստանի վարչապետ Նիկոլ Փաշինյանի վերարտադրության հնարավորությունները հաջորդ ամիս նախատեսված ընտրություններից առաջ՝ մտավախություն ունենալով, որ նրա հաղթանակը կարող է վերջնականապես ամրապնդել Հայաստանի վերադասավորումը դեպի Արևմուտք։ Այս մասին հայտնում է Reuters-ը՝ հղում անելով արևմտյան հետախուզական և պետական պաշտոնյաներին։

Հունիսի 7-ին նախատեսված ընտրություններից առաջ Մոսկվայի ծրագրերը, ըստ հինգ արևմտյան հետախուզական աղբյուրների և Reuters-ի տեսած փաստաթղթերի, ներառել են ապատեղեկատվական արշավներ՝ հօգուտ ռուսամետ թեկնածուների, ինչպես նաև հազարավոր ռուսաստանաբնակ հայերի Հայաստան տեղափոխելու ծրագիր՝ քվեարկության վրա ազդելու նպատակով։

3 միլիոն բնակչություն ունեցող Հայաստանը երկար տարիներ մնացել է Մոսկվայի ազդեցության ներքո և շարունակում է հյուրընկալել ռուսական զորքեր։ Սակայն վարչապետ Նիկոլ Փաշինյանը, ով ներկայում առաջատար է հարցումներում, վերջին տարիներին խորացրել է կապերը Եվրոպայի և ՆԱՏՕ-ի հետ։

ԱՄՆ նախագահ Դոնալդ Թրամփը չորեքշաբթի աջակցություն է հայտնել Փաշինյանի վերարտադրմանը։ Միաժամանակ ԱՄՆ պետքարտուղար Մարկո Ռուբիոն այցելել է Երևան, որտեղ ստորագրվել են հանքարդյունաբերական համաձայնագիր և «Թրամփի միջազգային խաղաղության և բարգավաճման ուղի» նախագծի վերաբերյալ փաստաթուղթ։

Հայաստանը 2024 թվականին սառեցրել է մասնակցությունը ռուսաստանյան անվտանգության դաշինքին, իսկ այս ամիս Եվրոպայի առաջնորդների գագաթնաժողովում հյուրընկալել է ՆԱՏՕ-ի գլխավոր քարտուղարին։

ՌԴ նախագահ Վլադիմիր Պուտինը բացահայտ դժգոհություն է հայտնել Փաշինյանի արևմտամետ քաղաքականությունից։ Վերջին օրերին Մոսկվան նախազգուշացրել է, որ Հայաստանը կարող է զրկվել էժան գազից, ինչպես նաև սահմանափակել է հայկական մրգերի, բանջարեղենի, ծաղիկների և կոնյակի ներմուծումը։

Reuters-ի աղբյուրների համաձայն՝ Մոսկվայի նախընտրելի թեկնածուն գործարար Սամվել Կարապետյանն է, ով այժմ դատվում է իշխանությունը տապալելու կոչերի մեղադրանքով։ Կարապետյանը հերքում է մեղադրանքները, իսկ նրա փաստաբան Ռոբերտ Ամստերդամը Reuters-ին հայտնել է, որ իր պաշտպանյալը որևէ տեղեկություն չունի ռուսական աջակցության մասին։

Ռուսաստանի ԱԳՆ-ն Reuters-ի հրապարակումը անվանել է կեղծ և «հակառուսական հռետորաբանություն»։
Հայաստանի կառավարության հաղորդակցության վարչությունը հրաժարվել է մեկնաբանել կոնկրետ մեղադրանքները, սակայն նշել է, որ ձեռնարկվում են միջոցներ՝ ապատեղեկատվության դեմ պայքարելու և ազատ ու թափանցիկ ընտրություններ ապահովելու համար։