Ռուսաստանի համար ընդունելի է այն ամենը, ինչը լավ է հայերի համար.Վլադիմիր Պուտին

Ռուսաստանի նախագահ Վլադիմիր Պուտինը հայտարարել է, որ Մոսկվան հարգում է Հայաստանի արտաքին տնտեսական քաղաքականության վերաբերյալ որոշումները: Նա ասել է, որ Ռուսաստանի համար ընդունելի է այն ամենը, ինչը լավ է հայերի համար: Այս մասին տեղեկացնում է ռուսական Мировое обозрение  լրատվամիջոցը:

«Ամեն ամենը , ինչը լավ է հայերի համար, ընդունելի է և լավ է Ռուսաստանի համար: Արեք այնպես, ինչպես ձեզ հարմար է», - ասել է Պուտինը։

Պուտինը ընդգծել է, որ ռուս և հայ ժողովուրդները վայելել են դարավոր բարեկամություն և հատուկ հարաբերություններ: Նա նշել է, որ Երևանի հնարավոր տնտեսական մերձեցումը Եվրամիության հետ չպետք է խաթարի Մոսկվայի հետ հումանիտար կապերը։

Պետության ղեկավարը նաև հիշեցրել է, որ Ուկրաինայի ճգնաժամը սկսվել է ԵՄ-ին միանալու փորձերից: Նա չի ներկայացրել որևէ լրացուցիչ մանրամասներ Հայաստանի քաղաքականության հնարավոր հետևանքների մասին։

Ավելի վաղ Բելառուսի նախագահ Ալեքսանդր Լուկաշենկոն հայտարարել էր, որ Եվրասիական տնտեսական միության (ԵԱՏՄ) փակ ձևաչափով գագաթնաժողովում չորս երկրների ղեկավարները համաձայնության են եկել Հայաստանում ստեղծված իրավիճակի վերաբերյալ հայտարարության շուրջ: Նրա խոսքով՝ հանդիպման մասնակիցները հայտնել են իրենց դժկամությունը Հայաստանը Եվրասիական տնտեսական միությունից դուրս տեսնելու հարցում, բայց միևնույն ժամանակ վերահաստատել են իրենց հարգանքը հայ ժողովրդի ընտրության նկատմամբ։