Սա վախի մթնոլորտ ստեղծելու և վարկաբեկման փորձ է. Վարդևանյանը` ձայնագրությունների մասին

ՀՀ հակակոռուպցիոն կոմիտեի հրապարակած ձայնագրությունների մի ստվար զանգվածը մոնտաժված են։ Այս համոզմունքը հայտնել է «Ուժեղ Հայաստան» դաշինքի պատգամավորի թեկնածու, փաստաբան Արամ Վարդևանյանն լրագրողների հետ զրույցում` անդրադառնալով կոմիտեի կողմից պարբերաբար հրապարակվող ընտրակաշառքի ձայնագրություններին, որոնք վերագրվում են քաղաքական ուժին։

 

«Ընդհանրապես նման դեպքեր գոյություն չունեն, ու մենք հիմա խոսում ենք սեպարատ, առանձին վարույթների մասին։ Նաև անմեղության կանխավարկածը մեր երկրում չի գործում։ Ինչի համար են այդ ձայնագրությունները հրապարակվում, երբ անգամ դրանց իսկությունը չի ստուգվել։ Սա վախի մթնոլորտ ստեղծելու, ինչպես նաև որոշակի իմաստով վարկաբեկման փորձ է, որը չի հաջողվելու»,– ասել է Վարդևանյանը։

 

Ինչ վերաբերում է նախընտրական քարոզարշավի ժամանակ իշխանության կողմից վարչական ռեսուրսի չարաշահման դեպքերին, փաստաբանը նշել է՝ այդ գործերով դիմել են ԿԸՀ, սակայն, ինչպես և կանխատեսելի էր, այս կառույցում կա տոտալ անգործություն։