Սարգիս Խանդանյանն ընդունել է Հայաստանում առաքելությունն ավարտող Ղազախստանի դեսպանին

ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը հուլիսի 13-ին ընդունել է Հայաստանի Հանրապետությունում իր դիվանագիտական առաքելությունն ավարտող Ղազախստանի Հանրապետության արտակարգ և լիազոր դեսպան Բոլատ Իմանբաևին: Այս մասին հայտնում են ՀՀ Ազգային ժողովի լրատվական ծառայությունից։

Սարգիս Խանդանյանը գոհունակությամբ ընդգծել է, որ Հայաստանի և Ղազախստանի միջև երկկողմ հարաբերություններն ու քաղաքական երկխոսությունը գտնվում են բարձր մակարդակի վրա՝ հիմնված փոխադարձ հարգանքի ու գործընկերային ամուր հիմքերի վրա: Հանձնաժողովի նախագահը հավելել է, որ վերջին հինգ տարիներին երկու երկրների հարաբերությունների զարգացման գործընթացում իր ուրույն ու ծանրակշիռ դերակատարումն է ունեցել խորհրդարանական դիվանագիտությունը:

Իր հերթին դեսպան Բոլատ Իմանբաևը խորին երախտագիտություն է հայտնել Հայաստանի գործադիր և օրենսդիր իշխանություններին՝ իր առաքելության ընթացքում ցուցաբերած համակողմանի աջակցության և սերտ ու արդյունավետ փոխգործակցության համար:

Հանդիպման ավարտին Սարգիս Խանդանյանը բարձր է գնահատել դեսպանի կատարած աշխատանքը՝ շնորհակալություն հայտնելով Հայաստանի հանդեպ ունեցած ջերմ վերաբերմունքի և երկկողմ կապերի սերտացման գործում ներդրած անձնական մեծ ավանդի համար: