Սպասում ենք ԲՀԿ–ի վերահաշվարկին. ի՞նչ տարբերակներ է առաջարկում Նարեկ Կարապետյանը

Հունիսի 8-ից ԲՀԿ–ն սկսել է ընտրության արդյունքների վերահաշվարկի գործընթաց։ Միայն 4 ընտրատեղամասում կատարված աշխատանքից հետո արդեն պարզ է դարձել՝ 120 ձայն քիչ է հաշվարկվել։

«Ուժեղ Հայաստան» կուսակցությունների դաշինքը սպասում է «Բարգավաճ Հայաստան» կուսակցության վերահաշվարկի ավարտին` հասկանալու համար հետագա քայլերը, հայտարարել է «Ուժեղ Հայաստանի» ցուցակի առաջին համարը զբաղեցնող Նարեկ Կարապետյանը։

«Գնում է ձայների վերահաշվարկ, ձայների վերահաշվարկի արդյունքում կիմանանք՝ «Բարգավաճ Հայաստան» կուսակցությունը մտնո՞ւմ է խորհրդարան, թե՞ չէ։ Այդ դեպքում հնարավորությունը կհասկանանք արդեն` Ազգային ժողովը կունենա՞ գործիքակազմ դեմ կանգնելու կարևոր նախագծերին, թե՞ ոչ։ Իշխանության փոփոխության համար 2 տարբերակ կա՝ մեկն ընտրությունն է, մյուսը՝ փողոցային պայքարը։ Փողոցային պայքարի արդյունքում պետք է ունենանք ԱԺ պատգամավորների մեծամասնության ձայնը, որը ստանալն ընտրություններից հետո ավելի բարդ է»,– ասել է Կարապետյանը։

Նա ընդգծել է՝ եթե «Քաղաքացիական պայմանագիր» կուսակցությունից ընդամենն 8 պատգամավոր փոխի իր դիրքորոշումը, ապա Նիկոլ Փաշինյանը կկորցնի իր աթոռը։